ក្រុមហ៊ុន McDonald’s បាននិយាយកាលពីថ្ងៃចន្ទថា ខ្លួននឹងលក់អាជីវកម្មរបស់ខ្លួននៅក្នុងប្រទេសរុស្ស៊ី បន្ទាប់ពីវាបានផ្អាកប្រតិបត្តិការនៅក្នុងប្រទេសនេះក្នុងរយៈពេលជាងពីរខែ ដោយសារតែការលុកលុយរបស់អ៊ុយក្រែន។
ក្រុមហ៊ុននេះបានស្ថិតចំណោមនិមិត្តសញ្ញាដែលគេស្គាល់បំផុតនៃមូលធននិយមអាមេរិក ហើយត្រូវបានបើកភោជនីយដ្ឋានដំបូងរបស់ខ្លួននៅក្នុងប្រទេសរុស្ស៊ីកាលពីជាង ៣២ឆ្នាំមុន។ ឥឡូវនេះ McDonald’s មានភោជនីយដ្ឋានជាង៨០០ និងបុគ្គលិក ៦២ ០០០នាក់នៅក្នុងប្រទេសរុស្ស៊ី។ ដោយ Franchisees មានប្រតិបត្តិការត្រឹមតែ ១៥ភាគរយប៉ុណ្ណោះនៅក្នុងប្រទេសរុស្ស៊ី ហើយក្រៅពីនេះក្រុមហ៊ុនកាន់កាប់កន្លែងដែលនៅសល់។
សេចក្តីប្រកាសរបស់ McDonald’s កាលពីថ្ងៃច័ន្ទ គឺជាការបង្ហាញពីភាពរឹងមាំនៃពិភពលោកខាងលិចប្រឆាំងនឹងរបបរបស់លោកពូទីន។ ដំបូងឡើយ បន្ទាប់ពីការលុកលុយរបស់រុស្ស៊ីលើអ៊ុយក្រែន McDonald’s បានរក្សាភាពស្ងៀមស្ងាត់ចំពោះការវាយប្រហារនេះ។ បន្ទាប់មកបន្ទាប់ពីមានការតវ៉ា និងរងសម្ពាធជាសាធារណៈ McDonald’s និងម៉ាកយីហោធំៗរបស់សហរដ្ឋអាមេរិកដូចជា Starbucks និង Coca-Cola បានផ្អាកអាជីវកម្មរបស់ពួកគេនៅក្នុងប្រទេសរុស្ស៊ី។
ជាមួយគ្នានេះដែរ ក្រុមហ៊ុន McDonald’s បាននិយាយថាខ្លួនកំពុងស្វែងរកអ្នកទិញក្នុងស្រុក។ McDonald’s បាននិយាយកាលពីថ្ងៃចន្ទថា ខ្លួនពុំធ្លាប់ “de-Arching” ឬចាកចេញពីទីផ្សារដ៏ធំមួយ។ ក្នុងនោះក្រុមហ៊ុនក៏នឹងត្រៀមដកឈ្មោះ ឡូហ្គោ Menu និងម៉ាកយីហោរបស់វាចេញពីទីតាំងទាំងនោះ ប៉ុន្តែក្រុមហ៊ុន នឹងនៅតែរក្សាពាណិជ្ជសញ្ញារបស់ខ្លួននៅក្នុងប្រទេសរុស្ស៊ី។
ក្រុមហ៊ុន McDonald’s ក៏បាននិយាយផងដែរថា ខ្លួននឹងព្យាយាមធ្វើឱ្យប្រាកដថាបុគ្គលិករបស់ខ្លួននៅក្នុងប្រទេសនឹងបន្តទទួលបានប្រាក់ខែរហូតដល់កិច្ចព្រមព្រៀងបានបញ្ចប់ ហើយនឹងព្យាយាមជួយពួកគេឱ្យបន្តការងាររបស់ពួកគេក្រោមម្ចាស់ថ្មី។ ហើយភោជនីយដ្ឋានរបស់ខ្លួនក្នុងប្រទេសអ៊ុយក្រែន ដែលត្រូវបានរងការវាយប្រហារដោយកងកម្លាំងរបស់ទីក្រុងម៉ូស្គូ ចាប់តាំងពីចុងខែកុម្ភៈនៅតែបិទ ប៉ុន្តែក្រុមហ៊ុនបាននិយាយថាខ្លួនកំពុងបន្តបើកប្រាក់ឈ្នួលពេញដល់បុគ្គលិករបស់ខ្លួននៅក្នុងប្រទេសនោះផងដែរ។
ប្រទេសរុស្ស៊ី និងអ៊ុយក្រែនមានចំណែកប្រហែល ២% នៃការលក់ពេញប្រព័ន្ធរបស់ McDonald និងប្រហែល ៩% នៃប្រាក់ចំណូលរបស់ខ្លួន និង ៣% នៃប្រាក់ចំណូលប្រតិបត្តិការរបស់ខ្លួន។
កាលពីខែមុន ក្រុមហ៊ុន McDonald’s Corp បានរាយការណ៍ថា ខ្លួនរកបាន ១,១ ពាន់លានដុល្លារក្នុងត្រីមាសទី១ ធ្លាក់ចុះពីជាង ១,៥ ពាន់លានដុល្លារកាលពីឆ្នាំមុន ដែលប្រាក់ចំណូលមានចំនួនជិត ៥,៧ពាន់លានដុល្លារ។
នៅក្នុងខែមីនា ក្រុមហ៊ុនបាននិយាយថា ការបិទបណ្តោះអាសន្នរបស់ខ្លួននឹងធ្វើឱ្យវាខាតបង់ប្រហែល ៥០លានដុល្លារក្នុងមួយខែ ឬ ៥សេនទៅ ៦សេនក្នុងមួយហ៊ុន។ ហើយការផ្អាកប្រតិបត្តិការនៅអ៊ុយក្រែន និងរុស្ស៊ីមានតម្លៃ ១២៧ លានដុល្លារ ឬ ១៣ សេនក្នុងមួយហ៊ុនក្នុងត្រីមាសទីមួយ៕
