ថៃ អនុញ្ញាតឲ្យហាងនៅទីក្រុងបាងកក បម្រើ​គ្រឿង​ស្រវឹង​ត្រឹមម៉ោង​ ១១​យប់

អភិបាលក្រុងបាងកក បាននិយាយកាលពីថ្ងៃចន្ទថា ភោជនីយដ្ឋានដែលបំពេញតាមស្តង់ដារគ្រប់គ្រងជំងឺ អាចបម្រើគ្រឿងស្រវឹងរហូតដល់ម៉ោង ១១ យប់ ចាប់ពីថ្ងៃពុធសប្តាហ៍នេះតទៅ ហើយម្ចាស់ហាងស្រាអាចប្តូរទីតាំងរបស់ពួកគេទៅជាភោជនីយដ្ឋាន ប្រសិនបើពួកគេចង់បើកឡើងវិញ។

លោកអភិបាល Aswin Kwanmuang បានចេញបទបញ្ជាចុងក្រោយ ស្តីពីការបិទ និងបើកឡើងវិញនូវទីតាំងអាជីវកម្ម ដោយអនុញ្ញាតឲ្យភោជនីយដ្ឋានក្នុងទីក្រុងបាងកក ដែលបំពេញតាមស្តង់ដាររដ្ឋបាលសុវត្ថិភាព និងសុខភាពរបស់ប្រទេសថៃ Amazing Thailand Safety & Health Administration (SHA) នៃក្រសួងទេសចរណ៍ និងកីឡា ព្រមទាំងស្តង់ដារ Thai Stop Covid Plus របស់នាយកដ្ឋានសុខាភិបាលថៃ អាចបម្រើភេសជ្ជៈមានជាតិអាល់កុល រហូតដល់ម៉ោង ១១ យប់ ដោយចាប់ផ្តើមពីថ្ងៃទី ១ ខែធ្នូ។

គួរឲ្យដឹងដែរថា បច្ចុប្បន្ននេះច្បាប់នៅក្នុងប្រទេសថៃ បានអនុញ្ញាតឲ្យភោជនីយដ្ឋានអាចបម្រើភេសជ្ជៈមានជាតិអាល់កុល ត្រឹមម៉ោង ៩យប់ប៉ុណ្ណោះ។ យ៉ាងណាមិញ បទបញ្ជា​ថ្មី​នេះ​មាន​ប្រសិទ្ធភាព​ពី​ថ្ងៃ​ទី​១ ដល់​ថ្ងៃ​ទី​៣១ ខែ​ធ្នូ។

យ៉ាងណាក៏ដោយ លោក Aswin បានបន្ថែមថា ហាងស្រា បារ និងហាងខារ៉ាអូខេ នឹងនៅតែបិទដើម្បីជួយទប់ស្កាត់ការរីករាលដាលនៃកូវីដ១៩ ហើយប្រសិនបើពួកគេចង់បើកឡើងវិញក្នុងពេលនោះ ពួកគេអាចប្តូរទីតាំងទៅជាកន្លែងបម្រើអាហារវិញ៕

Facebook Notice for EU! You need to login to view and post FB Comments!