អាចទេ Tesla ជិតឈានដល់កិច្ចព្រមព្រៀងបឋមក្នុងការសាងសង់រោងចក្រនៅក្នុងប្រទេសឥណ្ឌូនេស៊ី

Bloomberg បានរាយការណ៍កាលពីថ្ងៃពុធ ដោយលើកឡើងពីមនុស្សមិនស្គាល់អត្តសញ្ញាណដែលដឹងពីបញ្ហានេះថា Tesla ជិតឈានដល់កិច្ចព្រមព្រៀងបឋមក្នុងការសាងសង់រោងចក្រផលិតនៅក្នុងប្រទេសឥណ្ឌូនេស៊ីដែលមានសមត្ថភាពផលិតបាន ១ លានគ្រឿង។

នៅក្នុងការអត្ថាធិប្បាយនៅលើ tweet យោងរបាយការណ៍កាលពីថ្ងៃពុធ លោក Elon Musk នាយកប្រតិបត្តិក្រុមហ៊ុន Tesla បាននិយាយថា “សូមប្រយ័ត្នចំពោះការសរសេរអត្ថបទដែលលើកឡើងពី ‘ប្រភពដែលមិនបញ្ចេញឈ្មោះ’ ព្រោះថាវាតែងតែមិនពិត។

Bloomberg បាននិយាយនៅក្នុងរបាយការណ៍របស់ខ្លួនថា រដ្ឋមន្ត្រីវិនិយោគរបស់ប្រទេសឥណ្ឌូនេស៊ីបានបញ្ជាក់ពីកិច្ចពិភាក្សាជាមួយក្រុមហ៊ុនផលិតរថយន្តដ៏មានតម្លៃបំផុតរបស់ពិភពលោក។ ក្រុមហ៊ុនផលិតរថយន្តអគ្គិសនី និងក្រសួងវិនិយោគរបស់ប្រទេសឥណ្ឌូនេស៊ី មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ Reuters នោះទេ។

លោក Elon Musk កាលពីខែមុនបាននិយាយថាក្រុមហ៊ុន Tesla ជិតជ្រើសរើសទីតាំងនៃ “Gigafactory” ថ្មីរបស់ខ្លួនបន្ទាប់ពីរបាយការណ៍ប្រព័ន្ធផ្សព្វផ្សាយថាក្រុមហ៊ុនផលិតរថយន្តអាចប្រកាសរោងចក្រថ្មីនៅភាគខាងជើងរដ្ឋ Nuevo Leon នៅខែធ្នូ។

ខណៈ កាលពីខែវិច្ឆិកា លោក Musk បាននិយាយថា ប្រទេសកូរ៉េខាងត្បូងគឺជាទីតាំងដ៏ល្អរបស់ខ្លួនសម្រាប់រោងចក្រដែលខ្លួនគ្រោងនឹងសាងសង់នៅអាស៊ីសម្រាប់ផលិតរថយន្តអគ្គិសនី នេះបើយោងតាមការិយាល័យប្រធានាធិបតីកូរ៉េខាងត្បូង។ គួរបញ្ជាក់ផងដែរថា Tesla ផលិត​រថយន្ត​អគ្គិសនី​របស់​ខ្លួន​នៅ​ទីក្រុង​សៀងហៃ​របស់​ប្រទេស​ចិន ទីក្រុង Berlin របស់​ប្រទេស​អាល្លឺម៉ង់ និង​ទីក្រុង Austin និង Fremont នៅ​សហរដ្ឋអាមេរិក៕