[បទេស] នាពេលថ្មីៗនេះ សហព័ន្ធឧស្សាហកម្មថៃ (FTI) បានប្រកាសទម្លាក់គោលដៅក្នុងការលក់រថយន្តក្នុងស្រុករបស់ខ្លួនមកត្រឹម ៥៥ មុឺនគ្រឿងវិញ បន្ទាប់ពីការផលិតរថយន្តក្នុងឆ្នាំនេះមានការធ្លាក់ចុះគួរឲកត់សម្គាល់។ មានន័យថា ពួកគេបានកាត់បន្ថយការលក់រថយន្តក្នុងស្រុកពីចំនួន ៧៥ មុឺនគ្រឿងមកត្រឹម ៥៥ មុឺនគ្រឿង ដោយសារសង្វាក់ផលិតកម្មមានការធ្លាក់ចុះមកត្រឹម ១,៧ លានគ្រឿងនៅឆ្នាំនេះ។
បើយោងតាមលោក Surapong Paisitpattanapong អ្នកនាំពាក្យផ្នែកឧស្សាហកម្មរថយន្តរបស់ FTI បាននិយាយថាផលិតកម្មរថយន្តក្នុងប្រទេសថៃមានការធ្លាក់ចុះ ២០,១១ ភាគរយ នៅក្នុងខែមិថុនាបើធៀបនឹងខែមិថុនាឆ្នាំមុន ហើយផលិតកម្មរថយន្តក្នុងឆ្នាំ២០២៤ នេះត្រូវបានគេរំពឹងថានឹងមានតួលេខទាបជាងនៅឆ្នាំ២០២៣ បន្ទាប់ពីមានការចាត់វិធានការដ៏តឹងរ៉ឹងសម្រាប់ការអនុម័តឥណទានពីស្ថាប័នហិរញ្ញវត្ថុ គួបផ្សំនឹងបំណុលរបស់ប្រជាជនផ្ទាល់ផងដែរ។ ពួកគេបានបន្ថែមទៀតថា ក្នុងអំឡុងខែមករាដល់ខែមិថុនា ការផលិតរថយន្តបានធ្លាក់ចុះ ១៧,៣៩ ភាគរយ បើធៀបនឹងឆ្នាំមុន។
បើទោះបីជាសង្វាក់ផលិកម្មនៅប្រទេសថៃមានការធ្លាក់ចុះក៏ដោយ ក៏ការនាំចេញរថយន្តនៅតែត្រូវបានគេមើលឃើញថានឹងឈានដល់ចំនួន ១,១៥ លានគ្រឿងនៅក្នុងឆ្នាំ២០២៤នេះ ដោយសារប្រទេសថៃគឺជាមជ្ឈមណ្ឌលផលិតរថយន្តដ៏ធំបំផុតក្នុងតំបន់អាស៊ីអាគ្នេយ៍ និងជាមូលដ្ឋាននាំចេញសម្រាប់ក្រុមហ៊ុនផលិតរថយន្តកំពូលមួយចំនួនរបស់ពិភពលោក រួមទាំង Toyota និង Honda ជាដើម។