មនុស្សជោគជ័យភាគច្រើននៅលើពិភពលោកនេះ មិនសូវជាមានពេលដេកប៉ុន្មាននោះទេ ហើយពួកគេតែងតែធ្វើការសម្រេចចិត្តរាប់ពាន់រឿងក្នុងមួយថ្ងៃ ហើយគ្មានពេលសម្រាប់ខ្លួនឯងឡើយ។
ប៉ុន្តែបើយោងទៅតាមលោក Jeff Bezos អ្នកមានជាងគេបំផុតនៅលើពិភពលោក ដែលមានទ្រព្យសម្បត្តិសុទ្ធ ១៨១,៤ ពាន់លានដុល្លារ បានបង្ហើបឲ្យដឹងថា គន្លឹះនៃភាពជោគជ័យ គឺ៖
- ការដេកឲ្យបាន ៨ ម៉ោង ក្នុងមួយថ្ងៃ
- សម្រេចចិត្តរឿងធំ ២-៣ ក្នុងមួយថ្ងៃ
- ប្រជុំសំខាន់ៗមុនពេលអាហារថ្ងៃត្រង់
ស្ថាបនិក និងនាយកប្រតិបត្តិក្រុមហ៊ុន Amazon រូបនេះ បានសរសេរអត្ថបទអំពីរបៀបដែលលោកធ្វើការសម្រេចចិត្តនៅក្នុងសៀវភៅថ្មីរបស់លោក ចំណងជើងថា “Invent and Wander” ដែលបានចេញផ្សាយកាលពីសប្តាហ៍មុន។
Bezos បានពន្យល់ពីរបៀបដែលលោកដាក់មូលដ្ឋានគ្រឹះសម្រាប់ការសម្រេចចិត្តថា៖ ដេកឲ្យបាន ៨ ម៉ោងពេញ ហើយបន្ទាប់មក ទុកពេលសម្រាប់ពេលព្រឹក ដោយញ៉ាំអាហារពេលព្រឹកជាមួយកូន, ឆុង/ផឹកកាហ្វេ និងអានកាសែត។
ដល់ម៉ោង ១០ ព្រឹក លោកបានត្រៀមខ្លួនរួចជាស្រេចដើម្បីការប្រជុំ។ ហើយនៅពេលនាឡិកាដល់ម៉ោង ៥ ល្ងាច លោកដាក់អ្វីៗចុះទាំងអស់ ហើយរង់ចាំរហូតដល់ថ្ងៃស្អែក។
ទោះជាយ៉ាងណា លោក Bezos បាននិយាយថា លោកអាចដាក់អ្វីគ្រប់យ៉ាងទៅក្នុងបង្អួចរយៈពេល ៧ ម៉ោងនោះ ពីព្រោះលោកដឹងពីរបៀបកំណត់អាទិភាពរបស់វា៕
