វៀតណាម ក្លាយជាអ្នកទិញផ្លែស្វាយធំជាងគេពីកម្ពុជា

យោងតាមប្រភពព័ត៌មានវៀតណាម vnexpress បានឲ្យដឹងថា កម្ពុជា បាននាំចេញផ្លែស្វាយស្រស់ចំនួន ១៤ ម៉ឺនតោន ឬ ៨៦,៨ ភាគរយនៃការនាំចេញសរុប ទៅកាន់ប្រទេសវៀតណាម ក្នុងរយៈពេល ៧ ខែដំបូងនៃឆ្នាំ ២០២១ នេះ។

ដោយតាមរយៈការដកស្រង់ទិន្នន័យពីក្រសួងកសិកម្ម រុក្ខាប្រមាញ់ និងនេសាទកម្ពុជា ការិយាល័យពាណិជ្ជកម្មវៀតណាមបាននិយាយថា ប្រទេសកម្ពុជាបាននាំចេញផ្លែស្វាយចំនួន ១៦១ ២២៨ តោន នៅចន្លោះខែមករា និងកក្កដា ដែលកើនឡើង ២៤៨ ភាគរយពីមួយឆ្នាំទៅមួយឆ្នាំ។

ក្រៅពីផ្លែស្វាយស្រស់ កម្ពុជាបាននាំចេញដំណាប់ស្វាយចំនួនជិត ១៣ ៥២៥ តោន ក្នុងនោះមាន ៧៧ តោនទៅវៀតណាម, ១ ០០០ តោនទៅថៃ និង ១១ ០០០ តោនទៅកាន់ប្រទេសចិន ក្នុងរយៈពេល ៧ ខែនោះ។

គួរឲ្យដឹងដែរថា ប្រទេសកម្ពុជាដែលដាំដុះផ្លែស្វាយលើផ្ទៃដី ១២៦ ៦៦៨ ហិកតានាពេលបច្ចុប្បន្ន បាននាំចេញផ្លែស្វាយចំនួន ៨៤៥ ២៧៤ តោន ដែលមានតម្លៃជាង ៤៧៣,២ លានដុល្លារកាលពីឆ្នាំមុន ហើយភាគច្រើននាំចេញទៅកាន់ប្រទេសវៀតណាម ថៃ ចិន កូរ៉េខាងត្បូង សិង្ហបុរី រុស្ស៊ី និងបារាំង៕