បន្ទាប់ពីត្រូវបានហាមឃាត់មិនឱ្យមាននូវការនាំចេញឈីបដែលមានកម្លាំងខ្លាំង និងឈីបកម្រិតខ្ពស់ទៅកាន់ប្រទេសចិន ពេលនេះ ក្រុមហ៊ុនបច្ចេកវិទ្យារបស់ចិនគឺ Huawei បានចេញមុខមកម្តងទៀតដោយប្រកាសឲដឹងថា ពួកគេនឹងផលិតបន្ទះឈីបកម្រិតខ្ពស់ដោយខ្លួនឯង ពោលគឺនឹងមិនពឹងផ្អែកលើបច្ចេកវិទ្យាបរទេសទៀតនោះឡើយ ដែលក្នុងនោះក៏រួមបញ្ជូលនូវឈីប 5nm និង 3nm ផងដែរ។
ចំពោះការផលិតបន្ទះឈីប 5nm ក្រុមហ៊ុន Huawei នឹងប្រើប្រាស់នូវម៉ាស៊ីន lithography SSA800 ដែលផលិតដោយក្រុមហ៊ុន SMEE ចំណែកឈីប 3nm វិញ នឹងចាប់ផ្តើមផលិតកម្មនៅក្នុងឆ្នាំ 2026 ខាងមុខនេះ ខណៈនៅក្នុងពេលបច្ចុប្បន្ននេះកំពុងតែចាប់ផ្តើមធ្វើការស្រាវជ្រាវ និងអភិវឌ្ឍជាមួយក្រុមហ៊ុន SMIC ដោយប្រើប្រាស់នូវបច្ចេកវិទ្យា GAA ដែលគេស្គាល់ថាជាបច្ចេកវិទ្យាកម្រិតខ្ពស់។
គួរបញ្ជាក់ថា បើទោះបីជាក្រុមហ៊ុន Huawei អាចផលិតបន្ទះឈីបបានដោយខ្លួនឯងក៏ដោយ ក៏មានការអះអាងមួយចំនួនបានឲដឹងថា តម្លៃឈីបនេះក៏អាចនឹងមានមានកើនឡើងខ្ពស់ផងដែរ៕