[ទីផ្សារចិន] ក្រុមហ៊ុនផលិតរថយន្ត BYD បានធ្វើការដាក់បង្ហាញចេញជាផ្លូវការនូវរថយន្តអគ្គិសនី BYD Seal សេរ៊ីឆ្នាំ២០២៥ ជាផ្លូវការ ជាមួយតម្លៃលក់ចាប់ពី ២៤ ៥០០ ដុល្លារ ដល់ ៣៣ ៤០០ ដុល្លារ នៅក្នុងទីផ្សារប្រទេសចិន ។
រថយន្តនេះ ត្រូវបានផលិតឡើងនៅលើគ្រោងឆ្អឹង e-Platform 3.0 Evo មានប្រវែងតួខ្លួនសរុប ៤ ៨០០ ម.ម ទទឹង ១ ៨៧៥ ម.ម កម្ពស់ ១ ៤៦០ ម.ម និងប្រវែងគម្លាតកង់មុខ-ក្រោយ ២ ៩២០ ម.ម ដំណើរការដោយ៖
- ម៉ូទ័រអគ្គិសនីចំនួន ១ ប៉ុង ១ វិលកង់ក្រោយ ផលិតកម្លាំងបាន ២២៨ សេះ
- ម៉ូទ័រអគ្គិសនីចំនួន ១ ប៉ុង ១ វិលកង់ក្រោយ ផលិតកម្លាំងបាន ៣០៨ សេះ
- ម៉ូទ័រអគ្គិសនីចំនួន ២ ប៉ុង ២ AWD ផលិតកម្លាំងបាន ៥២៣ សេះ
ខណៈវាទទួលបានជម្រើសអាគុយចំនួន ២ រួមមាន ៦១ គីឡូវ៉ាត់ម៉ោង និង ៨០ គីឡូវ៉ាត់ម៉ោង អាចបើកបរបានចម្ងាយចាប់ពី ៥១០ គីឡូម៉ែត្រ ទៅ ៦៥០ គីឡូម៉ែត្រ នៅពេលសាកថ្មពេញម្តង រត់ស្ទុះពី ០-១០០ គ.ម/ម៉ោង ចំណាយពេល ៣,៨ វិនាទី មាន Top-speed ២៤០ គ.ម/ម៉ោង គាំទ្រការសាកថ្មល្បឿនលឿន អាចសាកឡើងពី ១០ ទៅ ៨០ ភាគរយ ក្នុងរយៈពេល ២៥ នាទី ប៉ុណ្ណោះ។
សម្រាប់ការរចនានៅផ្នែកខាងក្រៅរបស់រថយន្តនេះ នៅតែប្រើប្រាស់ការឌីស្សាញជាមួយប៉ាណាមុខបិទជិត ចង្កៀងមុខ-ក្រោយ LED ព្រមទាំងថាសកង់ស្ព័រ និងដៃទ្វារអគ្គិសនីី។ លើសពីនេះទៅទៀត រថយន្តនេះ បានទទួលការអាប់ឌែតប្រព័ន្ធជើងក្រោមផងដែរ។
ចំពោះផ្នែកខាងក្នុង ទទួលបានការរចនាថ្មី រួមជាមួយគ្រឿងបរិក្ខាស្តង់ដារមួយចំនួនរួមមាន កុងទ័របង្ហាញព័ត៌មានឌីជីថល អេក្រង់ព័ត៌មានកម្សាន្ត touchscreen កន្លែងសាកថ្មឥតខ្សែ អេក្រងលើកញ្ជក់ ម៉ាស៊ីនត្រជាក់អូតូនិងប្រព័ន្ធ ADAS ជាច្រើនទៀតដូចជា ពោងសុវត្ថិភាពចំនួន ១៣ ចំនុច ជាដើម៕