បន្ទាប់ពីមានការលក់ធ្លាក់ជាប់ៗគ្នាអស់រយៈពេល ២ ឆ្នាំ ពេលនេះ ក្រុមហ៊ុន Apple បានរកឃើញនូវការកើនឡើងវិញរបស់ខ្លួននៅក្នុងទីផ្សារចិនហើយ ដោយនៅក្នុងត្រីមាសទី ២ នៃឆ្នាំ ២០២៥ នេះ ពួកគេទទួលបាននូវការលក់កើនឡើងដល់ទៅ ៨ ភាគរយ ឯណ្ណោះ បើប្រៀបធៀបនឹងរយៈពេលដូចគ្នាកាលពីឆ្នាំមុន។
ចំពោះមូលហេតុដែលធ្វើការលក់មានការកើនឡើង គឺដោយសារតែការបង្ហាញចេញនូវ iPhone សេរ៊ីថ្មីរបស់ពួកគេគឺ iPhone 16 Series រួមជាមួយយុទ្ធសាស្រ្តនៅក្នុងការផ្សព្វផ្សាយថ្មី និងការបញ្ចុះតម្លៃខ្លាំងៗមុនពេលពិធីបុណ្យ 618 ដែលជាព្រឹត្តិការណ៍ទិញទំនិញដ៏ធំមួយនៅក្នុងប្រទេសចិន។
ក្នុងនោះ គឺមាននូវ iPhone សេរ៊ីថ្មីចំនួន ៣ម៉ូឌែលដែលបានចូលក្នុងចំណាត់ថ្នាក់ស្មាតហ្វូនលក់ដាច់បំផុតនៅក្នុងប្រទេសចិន ប៉ុន្តែបើទោះបីជាការលក់នៅក្នុងត្រីមាសទី ២ នៃឆ្នាំ ២០២៥ នេះមានការកើនឡើងវិញក៏ដោយ ក៏អ្នកវិភាគមួយចំនួនបានអះអាងថា ការលក់របស់ Apple ក៏អាចនឹងធ្លាក់ចុះវិញនៅក្នុងពាក់កណ្ដាលឆ្នាំក្រោយផងដែរ ដោយសារតែកម្រិតអាប់ដេតថ្មីៗរបស់ iPhone 17 គឺមិនសូវមាននូវភាពទាក់ទាញ។ លើសពីនេះ វាក៏អាចនឹងពាក់ព័ន្ធជាមួយនឹងសម្ពាធផ្នែកនយោបាយ និងការប្រកួតប្រជែងពីម៉ាកក្នុងស្រុកដូចជា Huawei និង Vivo ផងដែរ៕