TikTok ដែលជាកម្មវិធីចែករំលែកវីដេអូដ៏ពេញនិយមមួយដែលគ្រប់គ្រងដោយក្រុមហ៊ុន ByteDance បានបង្ហាញផែនការវិនិយោគ 8.8 ពាន់លានដុល្លារក្នុងការសាងសង់មជ្ឈមណ្ឌលទិន្នន័យនៅក្នុងប្រទេសថៃក្នុងរយៈពេល 5 ឆ្នាំខាងមុខ។ ការប្រកាសនេះត្រូវបានធ្វើឡើងដោយលោកស្រី Helena Lesch អនុប្រធានផ្នែកគោលនយោបាយសាធារណៈរបស់ TikTok ក្នុងអំឡុងពេលព្រឹត្តិការណ៍មួយដែលបានធ្វើឡើងក្នុងទីក្រុងបាងកកកាលពីថ្ងៃសុក្រ។
ក្នុងនោះ ការវិនិយោគនេះគឺជាការផ្លាស់ប្តូរមួយដ៏សំខាន់របស់ TikTok នៅពេលដែលក្រុមហ៊ុនបន្តពង្រីកប្រតិបត្តិការរបស់ខ្លួននៅក្នុងតំបន់ជាច្រើននៅទូទាំងពិភពលោក ខណៈព័ត៌មានលម្អិតនៃការវិនិយោគនេះនៅមិនទាន់បង្ហាញចេញនូវឡើយទេ ថាតើវានឹងរួមបញ្ចូលជាមួយនឹងកិច្ចព្រមព្រៀង 3.8 ពាន់លានដុល្លារ ដែលត្រូវបានប្រកាសដោយក្រុមប្រឹក្សាវិនិយោគរបស់ប្រទេសថៃកាលពីខែមុនឫអត់នោះទេ។
គួរគូសបញ្ជាក់ថា កាលពីចុងខែមករា ក្រុមប្រឹក្សាវិនិយោគរបស់រដ្ឋាភិបាលរបស់ប្រទេសថៃធ្លាប់បានរៀបរាប់លម្អិតអំពីកិច្ចព្រមព្រៀងមួយរបស់ TikTok ក្នុងការសាងសង់មជ្ឈមណ្ឌលទិន្នន័យនៅក្នុងប្រទេសថៃដោយមានការវិនិយោគប្រមាណ 3.8 ពាន់លានដុល្លារ ក្នុងគោលបំណងជំរុញហេដ្ឋារចនាសម្ព័ន្ធឌីជីថលនៅក្នុងប្រទេសថៃ៕