LG ដែលជាក្រុមហ៊ុនផលិតគ្រឿងអេឡិចត្រូនិកធំមួយរបស់កូរ៉េខាងត្បូង ត្រូវបានបង្កើតឡើងនៅឆ្នាំ ១៩៤៧ ដោយលោក Koo In-Hwoi។
ពីដំបូងឡើយ ក្រុមហ៊ុននេះគឺជារោងចក្រផលិតគ្រឿងសម្អាង ជាក្រុមហ៊ុនតូចមួយឈ្មោះថា Lak Hui Chemical Industrial Corporation ស្ថិតនៅទីក្រុង ប៊ូសាន ប្រទេសកូរ៉េខាងត្បូង។ រួមទាំងមានអាជីវកម្មមួយទៀតដែលជាក្រុមហ៊ុនផលិតប្លាស្ទិក។
បន្ទាប់ពីសង្រ្គាមកូរ៉េបានបញ្ចប់ នៅឆ្នាំ ១៩៥៨ លោក Koo In-Hwoi បានបង្កើតក្រុមហ៊ុនមួយទៀតឈ្មោះ GoldStar ផ្តោតទាំងស្រុងទៅលើការផលិតឧបករណ៍អេឡិច ត្រូនិកប្រើប្រាស់ក្នុងផ្ទះ។ ជាក្រុមហ៊ុនទី ១ ដែលបានផលិតឡើងនូវសម្ភារអេឡិចត្រូនិក សំខាន់ៗដូចជា វិទ្យុ ទូរទឹកកក ទូរទស្សន៍ និងម៉ាសុីនបោកគក់ សម្រាប់ប្រើប្រាស់ដំបូងគេបង្អស់នៅកូរ៉េខាងត្បូង។ សន្ទុះការគាំទ្រច្រើន រហូតជាប់ឈ្មោះជាក្រុមហ៊ុនឈានមុខគេក្នុងការផលិតគ្រឿងអេឡិចត្រូនិកនៅឆ្នាំនោះទៀតផង។
នៅទសវត្សរ៍ឆ្នាំ ១៩៨០ លោក Koo In-Hwoi បានបញ្ចូលក្រុមហ៊ុន Lak Hui និង GoldStar ទៅជាសម្ព័ន្ធក្រុមហ៊ុនតែមួយឈ្មោះថា Lucky-Goldstar រួចក៏ប្តូរជាផ្លូវការទៅជា LG។ ក្រុមហ៊ុនចាប់ផ្តើមអភិវឌ្ឍន៍កាន់តែខ្លាំងទៅលើជំនួញរបស់ពួកគេ ដោយនៅក្នុងឆ្នាំ ១៩៨៥ LG ចាប់ផ្តើមការផលិតទៅលើកុំព្យូទ័រយួរដៃ ចំណែកឆ្នាំ ១៩៩៥ ក៏ចាប់ផ្តើមការផលិតទូរស័ព្ទម្តង។
ជាមួយគ្នានេះដែរ ក្រុមហ៊ុនក៏បានវិនិយោគទៅលើបច្ចេកវិទ្យាជាច្រើនទៀត រួមមាន ការបង្កើតអេក្រង់ប្លាស្មាទំហំ ៦០ អ៊ីញដំបូងបង្អស់ក្នុងឆ្នាំ ១៩៩៨។ ការបណ្តាក់ទុនរួមគ្នាជាមួយក្រុមហ៊ុន Philips លើការផលិតអេក្រង់ LCD ដែលបច្ចុប្បន្នក្លាយទៅជា LG Display។
សព្វថ្ងៃនេះវិញ LG មិនមែនជាក្រុមហ៊ុនតែមួយនោះទេ ប៉ន្តែជាក្រុមហ៊ុនដែលមានបុត្រសម្ព័ន្ធបែងចែកជាវិស័យ ៤ ធំៗដូចជា ១) LG Electronics ផ្តោតទៅលើការផលិតគ្រឿងអេឡិចត្រូនិក; ២) LG Chem ផ្តោតទៅលើការផលិតសម្ភារៈឧស្សាហកម្ម និងវត្ថុធាតុដើមសម្រាប់ផលិតអាគុយ; ៣) LG Display ជាអ្នកផលិតអេក្រង់សម្រាប់ទូរទស្សន៍, កុំព្យូទ័រ, ស្មាតហ្វូន; ៤) LG Uplus ជាក្រុមហ៊ុនផ្តល់សេវាទូរគមនាគមន៍នៅក្នុងប្រទេសកូរ៉េខាងត្បូង។
ជាក្រុមហ៊ុនមានប្រវត្តិដ៏រឹងមាំមួយ ដែលផ្តើមចេញពីរោងចក្រផលិតគ្រឿងសម្អាងក៏ពិតមែន តែមានការវិវត្តខ្លួនឥតឈប់ឈរបានធ្វើឲ្យ LG ក្លាយជាក្រុមហ៊ុនបច្ចេកវិទ្យា មានសមត្ថភាពផ្គត់ផ្គង់យ៉ាងពេញលេញ ជាក្រុមហ៊ុនលំដាប់ទី ៣ ឈានមុខគេមួយប្រចាំកូរ៉េខាងត្បូង រួមទាំងក្នុងសកលលោកផងដែរ។