Olivier Bernhard គឺជាអតីតអត្តពលិកប្រទេសស្វីស ដែលបានឈ្នះពានរង្វាន់ជើងឯកពិភពលោក និងជើងឯកស្វីសក្នុងការប្រកួត Triathlon និង Duathlon។ ក្រោយពីប្រកាសចូលនិវត្តន៍ លោកក៏បានសម្រេចចិត្តបង្កើតម៉ាកយីហោស្បែកជើងផ្ទាល់ខ្លួន On ឡើងមក។
នៅកាលនោះ លោកបានបង្ហាញគំនិតផលិតស្បែកជើងទៅកាន់ក្រុមហ៊ុន Nike មុនគេ ប៉ុន្តែគំនិតលោកត្រូវបានក្រុមហ៊ុនបដិសេធភ្លាមៗ។ លោក Olivier Bernhard ក៏បានផ្លាស់ប្តូរទិសដៅ ដោយបានយកគំនិត និងផែនការដែលលោកបានរៀបចំទៅបង្ហាញមិត្តភក្តិលោក David Allemann និង Caspar វិញ។ 
នៅឆ្នាំ ២០១០ ពួកគេសហការគ្នាបង្កើតបានជា ក្រុមហ៊ុន On Holding AG នៅទីក្រុង Zurich នៃប្រទេសស្វីស ជាមួយនឹង concept Running on Clouds ដែលបង្ហាញពីម៉ូតស្បែកជើងដែលមានសភាពស្រាល។ មិនគួរឲ្យជឿនោះអ្នកទាំងបី ចាប់ផ្តើមក្រុមហ៊ុននៅអំឡុងពេលសេដ្ឋកិច្ចធ្លាក់ចុះខ្លាំង។ ជាពេលមួយដែលគ្រោះថ្នាក់សម្រាប់អាជីវកម្មថ្មីដូចពួកគេ តែផ្ទុយមកវិញ បែរជាទទួលបានការគាំទ្រច្រើន ក៏ព្រោះតែមនុស្សចាប់ផ្តើមចំណាយប្រាក់ទៅលើការថែរក្សាសុខភាព ដូចជាការលេងកីឡា ជាពិសេសពីអ្នកដែលស្រឡាញ់កីឡារត់ប្រណាំង។
តាមរយៈបទសម្ភាសន៍មួយ លោក Bernhard និយាយថា លោកត្រូវបានគេប្រាប់ជាច្រើនដងកុំឲ្យប្រកួតប្រជែងជាមួយម៉ាកស្បែកជើងធំៗដទៃ។ ប៉ុន្តែនេះជាគំនិតដែលលោកចំណាយពេលយូរណាស់ ជាមួយនឹងបទពិសោធន៍ និងការស្រឡាញ់ទៅលើកីឡា ដូច្នេះលោកត្រូវតែបញ្ចេញ ដោយនេះមិនមែនចង់ឈ្នះអ្នកដទៃ តែជាអ្វីដែលឈ្នះខ្លួនឯង និងផ្តល់លទ្ធផលពេញលេញសម្រាប់ខ្លួនលោកដែលបានខិតខំកន្លងមក។
មួយវិញទៀតនោះ ម៉ាកយីហោ On តែងតែផ្តោតទៅលើផលិតផល ជាងផ្តោតទៅលើការប្រកួតប្រជែងនៅលើទីផ្សារ ពួកគេយកចិត្តទុកដាក់ក្នុងការផលិត ដើម្បីរក្សាគុណភាព និងភាពងាយស្រួលដល់អតិថិជន។ សព្វថ្ងៃនេះ ម៉ាកយីហោ On ត្រូវបានចែកចាយនៅក្នុង ៥០ ប្រទេសជាមួយនឹងហាងជាង ៦០០០ កន្លែង។
មេរៀនមួយដែលទទួលបានពីលោក Olivier Bernhard នោះគឺ ការបដិសេធរបស់អ្នកដទៃ មិនបានធ្វើឲ្យអ្នកបញ្ចប់ត្រឹមនឹងនោះទេ គិតពីចំណុចវិជ្ជមាន ត្រូវសម្លឹងមើលទៅមុខ ដើម្បីសម្រេចបំណងដែលអ្នកតែងតែប៉ងឲ្យចេញជាការពិត។