នៅថ្ងៃពុធ ទី ២៨ ខែឧសភា ឆ្នាំ ២០២៥ តុលាការសហព័ន្ធរបស់សហរដ្ឋអាមេរិក បានប្រកាសចេញនូវសេចក្តីសម្រេចមួយដ៏សំខាន់ដើម្បីរារាំងការដំឡើងពន្ធនាំចូលជាច្រើនដែលបង្កើតឡើងក្នុងអំឡុងរដ្ឋាភិបាលលោក Donald Trump ដែលបានប្រើប្រាស់សិទ្ធិហួសពីអំណាចរបស់ប្រធានាធិបតី ក្នុងការប្រើពន្ធគយជាវិធានការសេដ្ឋកិច្ច ដោយពន្ធទាំងនោះបានជះឥទ្ធិពលខ្លាំងលើក្រុមហ៊ុនតូច ក្រុមហ៊ុនធំ និងសេដ្ឋកិច្ចរបស់ប្រជាពលរដ្ឋធម្មតា។
នៅពេលដែលតុលាការបានប្រកាសចេញនូវសេចក្តីសម្រេចមួយនេះ ខាងសេតវិមានក៏បានឆ្លើយតបទៅនឹងសេចក្តីសម្រេចនេះ ដោយការប្តឹងឧទ្ធរណ៍ភ្លាមៗផងដែរថា ការសម្រេចនេះគឺមានភាពមិនសមស្រប។
ក្នុងនោះ ការដាក់បណ្តឹងនេះ ត្រូវបានធ្វើឡើងដោយអង្គការមិនរកប្រាក់ចំណេញមួយឈ្មោះ Liberty ដែលតំណាងឱ្យអាជីវកម្មខ្នាតតូចៗចំនួន ៥ ដោយពួកគេបានអះអាងថា ការដាក់ពន្ធគយនាំចូលរបស់លោក Donald Trump បានបង្កឲមានការខូចខាតដល់អាជីវកម្មក្នុងស្រុកជាច្រើន និងបណ្ដាលឱ្យមានការកើនឡើងនៃតម្លៃទំនិញ និងការបាត់បង់ការងារ។
ជាមួយគ្នានេះ ចៅក្រមក៏បានសម្រេចឱ្យផ្អាកការអនុវត្តន៍ពន្ធនាំចូលសរុប ១០% លើទំនិញពីប្រទេសជាច្រើន ព្រមទាំងពន្ធ ៣០% លើទំនិញចិន និង ២៥% របស់ប្រទេសម៉ិកស៊ិក និងកាណាដា ផងដែរ ប៉ុន្តែពន្ធរថយន្ត និងសម្ភារៈខ្លះៗនៅតែបន្តអនុវត្តបានដដែល ដោយសារស្ថិត និងស្របតាមច្បាប់ដែលបានកំណត់៕