ដើម្បីបន្តប្រកួតប្រជែងជាមួយក្រុមហ៊ុនផលិតស្មាតហ្វូនផ្សេងៗជាច្រើននៅទូទាំងពិភពលោក នៅក្នុងពេលថ្មីៗនេះ ក្រុមហ៊ុន Sony បានប្រកាសធ្វើការផ្លាស់ប្តូរយុទ្ធសាស្ត្រដ៏សំខាន់មួយនៅក្នុងការផលិតស្មាតហ្វូនរបស់ខ្លួន ដោយពួកគេនឹងធ្វើការផ្លាស់ប្ដូរពីការផលិតស្មាតហ្វូនដោយខ្លួនឯងផ្ទាល់មកឱ្យក្រុមហ៊ុនផលិតស្មាតហ្វូនភាគីទីបីផលិតជំនួសវិញ។
ក្នុងចំណោមការផ្លាស់ប្តូរនេះ ស្មាតហ្វូនម៉ូដែល Xperia 1 VII ដែលទើបប្រកាសចេញថ្មី គឺជាស្មាតហ្វូនដំបូងគេដែលត្រូវបានផលិតដោយក្រុមហ៊ុនភាគីទីបី។
គួរបញ្ជាក់ថា ជារៀងរាល់ឆ្នាំ ក្រុមហ៊ុន Sony តែងតែផលិតស្មាតហ្វូនរបស់ខ្លួននៅក្នុងរោងចក្រនៅក្នុងប្រទេសថៃ និងប្រទេសចិន ប៉ុន្តែនៅក្នុងឆ្នាំ២០២៥ នេះ វិញ គ្រប់រោងចក្ររបស់ពួកគេពុំមានបញ្ជីផលិតស្មាតហ្វូនទៀតនោះឡើយ ហើយការផ្លាស់ប្តូររបស់ក្រុមហ៊ុន Sony នេះ ក៏ទំនងជាជាផ្នែកមួយនៃយុទ្ធសាស្ត្ររយៈពេលវែងរបស់ក្រុមហ៊ុន ដើម្បីកាត់បន្ថយការចំណាយថ្លៃដើម និងផ្ដោតលើការច្នៃប្រឌិតថ្មីៗជំនួសវិញ ដើម្បីបន្តប្រកួតប្រជែងជាមួយក្រុមហ៊ុនផលិតស្មាតហ្វូនផ្សេងៗជាច្រើននៅទូទាំងពិភពលោកដែលកំពុងតែមានការកើនឡើងយ៉ាងខ្លាំងនាពេលសព្វថ្ងៃនេះផងដែរ៕