នៅក្នុងបរិបទនយោបាយពាណិជ្ជកម្មតានតឹងរវាងសហរដ្ឋអាមេរិក និងប្រទេសចិន, ក្រុមហ៊ុនបច្ចេកវិទ្យាយក្ស Apple បានប្រកាសដាក់ចេញនូវយុទ្ធសាស្ត្រថ្មីមួយ ដោយពួកគេបានបញ្ចេញផលិតផលសំខាន់ៗរបស់ខ្លួនពីប្រទេសឥណ្ឌា ទៅកាន់ទីផ្សារសហរដ្ឋអាមេរិក។ ជាផ្នែកមួយនៃការបង្វែរផ្លូវផលិតកម្មនេះ Apple បានជួលយន្តហោះដឹកទំនិញ ដើម្បីដឹក iPhone ប្រហែល 1.5 លានគ្រឿង ឬ 600 តោន ពីឥណ្ឌាទៅសហរដ្ឋអាមេរិក។
សម្រាប់ការធ្វើការផ្លាស់ប្តូរនេះ គឺដើម្បីជៀសវាងអត្រាពន្ធខ្ពស់ដែលប្រធានាធិបតីអាមេរិកលោក Donald Trump បានដាក់លើទំនិញនាំចូលពីប្រទេសជាច្រើននៅទូទាំងពិភពលោក ជាពិសេសគឺប្រទេសចិន ដែលមានអត្រាពន្ធច្រើនជាងគេដល់ទៅ ១៤៥ភាគរយ ឯណ្ណោះ។
គួរឲដឹងថា ប្រទេសចិន គឺជាមជ្ឈមណ្ឌលផលិតកម្មយ៉ាងសំខាន់របស់ Apple កន្លងមក ប៉ុន្តែការកើនឡើងនៃពន្ធរបស់អាមេរិកលើទំនិញចិនបានបង្ខំឲ្យក្រុមហ៊ុនចាប់ផ្តើមបង្វែរផ្លូវទៅកាន់ប្រទេសឥណ្ឌាវិញ ដែលមានអត្រាពន្ធទាបជាងគឺត្រឹមតែ 26% ប៉ុណ្ណោះ ហើយក៏កំពុងត្រូវបានផ្អាកក្នុងរយៈពេល 90 ថ្ងៃផងដែរ ដើម្បីចរចា និងដោះស្រាយក្នុងបញ្ជុះពន្ធវិញ។
ក្នុងនោះ Apple បានបង្កើនការផលិតផលិតផលជាច្រើនរបស់ខ្លួននៅក្នុងរោងចក្ររបស់ក្រុមហ៊ុន Foxconn ដែលជាដៃគូររបស់ខ្លួននៅក្នុងទីក្រុង Chennai ប្រទេសឥណ្ឌា ហើយបាន និងកំពុងបន្ថែមការដឹកជញ្ជូនតាមអាកាសជាខ្លាំង និងបានទទួលការគាំទ្រពីរដ្ឋាភិបាលឥណ្ឌាទៀតផង៕