អ្នកការទូតកំពូលរបស់ប្រទេសជប៉ុន បានប្រាប់ឲ្យដឹងថា ជប៉ុនកំពុងធ្វើការយ៉ាងជិតស្និទ្ធជាមួយបណ្តាប្រទេស G7 ដើម្បីធានាឲ្យមានការដាក់ទណ្ឌកម្មសេដ្ឋកិច្ចប្រកបដោយប្រសិទ្ធភាព ប្រឆាំងនឹងប្រទេសរុស្ស៊ី និងធនាគារកណ្តាលរបស់វា។
លោក Masato Kanda អនុរដ្ឋមន្ត្រីក្រសួងហិរញ្ញវត្ថុជប៉ុន ទទួលបន្ទុកកិច្ចការអន្តរជាតិ បានប្រាប់អ្នកយកព័ត៌មានកាលពីថ្ងៃច័ន្ទថា “យើងនឹងឆ្លើយតបដោយធ្វើការយ៉ាងជិតស្និទ្ធ ជាមួយសហគមន៍អន្តរជាតិ រួមទាំងប្រទេស G7 ដើម្បីឲ្យយើងដាក់ទណ្ឌកម្មអតិបរមាដល់ប្រទេសរុស្ស៊ី សម្រាប់ការឈ្លានពានអ៊ុយក្រែន”។
លោក Kanda ដែលមើលការខុសត្រូវលើគោលនយោបាយរូបិយប័ណ្ណរបស់ប្រទេសជប៉ុន នៅក្រសួងហិរញ្ញវត្ថុ (MOF) បានធ្វើការកត់សម្គាល់បន្ទាប់ពីកិច្ចប្រជុំជាមួយសមភាគីរបស់លោកនៅធនាគារកណ្តាលជប៉ុន និងទីភ្នាក់ងារសេវាកម្មហិរញ្ញវត្ថុ ដែលជាការប្រមូលផ្តុំលើកដំបូងក្នុងរយៈពេលប្រហែលមួយឆ្នាំ។
គួរឲ្យដឹងដែរថា ភាគហ៊ុនរបស់ជប៉ុនបានធ្លាក់ចុះ ហើយប្រាក់យ៉េន បានទាក់ទាញតម្រូវការជារូបិយប័ណ្ណដែលមានសុវត្ថិភាពកាលពីថ្ងៃចន្ទ បន្ទាប់ពីបណ្តាប្រទេសលោកខាងលិចបានដាក់ទណ្ឌកម្មថ្មីលើរុស្ស៊ី សម្រាប់ការលុកលុយអ៊ុយក្រែន រួមទាំងការបិទធនាគារមួយចំនួនពីប្រព័ន្ធទូទាត់អន្តរជាតិ SWIFT ផងដែរ។
លោក Kanda បានបន្ថែមទៀតថា “យើងកំពុងកែតម្រូវ ជាមួយសេដ្ឋកិច្ចលោកខាងលិច ដើម្បីធានាថាការដាក់ទណ្ឌកម្មមានប្រសិទ្ធភាព។ ស្ថិរភាពទីផ្សារ គឺមានសារៈសំខាន់ខ្លាំងណាស់ ហើយរដ្ឋាភិបាលកំពុងឃ្លាំមើលការអភិវឌ្ឍទីផ្សារយ៉ាងដិតដល់”៕