ទេសាភិបាលធនាគារកណ្តាលថៃ បាននិយាយថា ពួកគេមានការព្រួយបារម្មណ៍ជាមួយនឹងតម្លៃខ្ពស់សម្រាប់ថ្លៃរស់នៅ ប៉ុន្តែមិនមែនទាក់ទងនឹងស្ថិរភាពតម្លៃទាំងមូលនោះទេ។
លោក Sethaput Suthiwartnaruput ទេសាភិបាលធនាគារកណ្តាលថៃ បានមានប្រសាសន៍ថា ធនាគារជឿជាក់ថាតម្លៃកាន់តែខ្ពស់នឹងមិនជះឥទ្ធិពលអាក្រក់ដល់សេដ្ឋកិច្ចម៉ាក្រូទេ ហើយអតិផរណានឹងនៅតែស្ថិតក្នុងគោលដៅរបស់ខ្លួន។ លោកបន្តថា ការឡើងថ្លៃថាមពល និងអាហារ អាចបន្ថែមថ្លៃរស់នៅឲ្យកាន់តែខ្ពស់ ចំពេលមានការស្ទុះងើបនៃសេដ្ឋកិច្ចយឺតៗ។
ធនាគារកណ្តាលថៃព្យាករថា អត្រាអតិផរណានឹងស្ថិតនៅក្រោមអត្រាគោលដៅរបស់ខ្លួន គឺ ១,៧% និង ១,៤% សម្រាប់ឆ្នាំ ២០២២ និងឆ្នាំ ២០២៣។
យ៉ាងណាមិញ លោក Sethaput មានប្រសាសន៍ថា ថ្លៃរស់នៅខ្ពស់អាចប៉ះពាល់ដល់អ្នកដែលមានចំណូលទាប ជាពិសេសអ្នកនៅក្នុងវិស័យទេសចរណ៍ និងផ្នែកពាក់ព័ន្ធ។ លោកថា ពេលនេះមិនមែនជាពេលវេលាត្រឹមត្រូវក្នុងការដំឡើងប្រាក់ឈ្នួលអប្បបរមាទេ ព្រោះទីផ្សារការងារនៅតែផុយស្រួយ បើទោះជាប្រជាជនធ្លាក់ចុះចំណូល និងថ្លៃដើមរស់នៅខ្ពស់ក៏ដោយ។
លោក Sethaput បានបញ្ជាក់ទៀតថា ការដំឡើងប្រាក់ឈ្នួលអប្បបរមានៅពេលនេះ អាចប៉ះពាល់ដល់ទស្សនវិស័យការងារ៕