លោក Elon Musk មានឈ្មោះពេញ Elon Reeve Musk។ លោកកើតនៅឆ្នាំ ១៩៧១ ដែលមានសញ្ជាតិកាណាដា-អាមេរិក មានដើមកំណើតនៅប្រទេសអាហ្វ្រិកខាងត្បូង។ ជាបុគ្គលជោគជ័យ និងមានឥទ្ធិពលមួយរូបនាពេលបច្ចុប្បន្ន។ លោកត្រូវបានគេស្គាល់ថាជាសហគ្រិនដែលមានចក្ខុវិស័យវែងឆ្ងាយ និងហ៊ានធ្វើអ្វីដែលអ្នកដទៃគិតថាមិនអាចទៅរួច។
ត្រឡប់កាលនៅក្មេង Musk ចូលចិត្តអានរឿងបែបវិទ្យាសាស្រ្ត និងបច្ចេកវិទ្យាកុំព្យូទ័រ។ ដោយនៅវ័យ ១០ឆ្នាំ លោកបានទិញកុំព្យូទ័រដំបូងរបស់ខ្លួន និងចាប់ផ្តើមរៀនសរសេរកម្មវិធីដោយខ្លួនឯង។ កម្មវិធីដែលលោកបង្កើតឡើងដំបូងគឺ Blastar ដែលជាប្រភេទហ្គេម បានលក់ក្នុងតម្លៃ ៥០០ដុល្លារ ដែលជាប្រាក់ចំណូលដំបូងលោកទទួលបានក្នុងវ័យ ១២ឆ្នាំ។
ក្នុងឆ្នាំ ១៩៨៩ វ័យ ១៧ឆ្នាំ លោកបានជាប់អាហាររូបករណ៍ រួមទាំងបានផ្លាស់ទៅប្រទេសកាណាដា ដើម្បីចូលរៀនមហាវិទ្យាល័យ Pennsylvania។ លោក Musk បានបញ្ចប់ការសិក្សាជាមួយនឹងសញ្ញាបត្រពីរ គឺកម្រិតបរិញ្ញាបត្រផ្នែកសេដ្ឋកិច្ច រួចក៏បានបន្តការសិក្សាបរិញ្ញាបត្រទីពីរ ផ្នែករូបសាស្រ្ត។
បន្ទាប់មក លោកបានត្រឡប់មកសហរដ្ឋអាមេរិកវិញ ដើម្បីបន្តសិក្សាថ្នាក់បណ្ឌិត ផ្នែកថាមពលរូបសាស្រ្តនៅមហាវិទ្យាល័យ Stanford។ ចូលរៀនបានត្រឹម ២ថ្ងៃ លោកបានឈប់ដោយមកបើកក្រុមហ៊ុនដំបូងរបស់ខ្លួនមានឈ្មោះថា Zip2 នៅក្នុងឆ្នាំ ១៩៩៥។
Zip2 ជាក្រុមហ៊ុនមួយដែលមានដោយផ្ដោតសំខាន់លើផ្នែកព័ត៌មានវិទ្យា។ ជាក្រុមហ៊ុនមគ្គុទេសក៍ទីក្រុង លើបណ្តាញអ៊ិនធើណេត Zip2 ដល់វេបសាយ New York Times និង Chicago Tribune។ នៅក្នុងឆ្នាំ ១៩៩៩ ក្រុមហ៊ុននេះ ត្រូវបានទិញយកដោយ Compaq Computers ក្នុងទំហំទីកប្រាក់ ៣០៧លានដុល្លារ រួមទាំង ៣៤លានដុល្លារទៀតលើតម្លៃហ៊ុន។ ធ្វើឲ្យលោក Elon Musk ក្លាយជាមហាសេដ្ឋីក្នុងវ័យត្រឹមជាង ២០ឆ្នាំ។
ក្រោយពីលក់ក្រុមហ៊ុនដំបូងរបស់ខ្លួន នៅឆ្នាំ ១៩៩៩ លោក Musk បានសហការជាមួយដៃគូ ដើម្បីចាប់ផ្តើមក្រុមហ៊ុនថ្មីមួយឈ្មោះថា X.com ដែលបានប្តូរឈ្មោះទៅជា PayPal វិញ។ ជាក្រុមហ៊ុនផ្តល់សេវាកម្មហិរញ្ញវត្ថុ និងការទូទាត់ប្រាក់តាមអនឡាញ។ ក្នុងឆ្នាំ ២០០២ ក្រុមហ៊ុន eBay បានទិញយក PayPal ជាមួយនឹងទឹកប្រាក់ ១,៥ពាន់លានដុល្លារ។ មុនពេលលក់ចេញ លោក Musk មានកាន់កាប់ហ៊ុនរបស់ PayPal ចំនួន ១១% នៃហ៊ុនសរុប។
Elon Musk បានបន្តសាងក្រុមហ៊ុនទីបីនាឆ្នាំ ២០០២ ដែលមានឈ្មោះថា SpaceX ដោយលោកមានបំណងនឹងសាងសង់យានអវកាសសម្រាប់ធ្វើដំណើរក្នុងលំហអាកាស។ នៅឆ្នាំ ២០០៨ ក្រុមហ៊ុននេះទទួលបានរង្វាន់ពីភ្នាក់ងារអវកាស ណាសា ក្នុងការផលិតយានសម្រាប់បញ្ជូនទំនិញទៅកាន់ស្ថានីយអវកាស។
នៅឆ្នាំ ២០០៤ លោក Elon Musk បានចូលរួមជាមួយក្រុមហ៊ុន Tesla Motors ដែលជាក្រុមហ៊ុនជំនាញផ្នែកផលិត និងរចនារថយន្តអគ្គិសនីដែលមានតម្លៃសមរម្យ។ ក្រោមការណែនាំរបស់លោក Tesla បានបង្ហាញរថយន្តអគ្គិសនីមានសមត្ថភាពខ្ពស់ ជាមួយនឹងម៉ូដែលល្បីៗជាច្រើន ក្នុងការរុញច្រាន Tesla ឲ្យក្លាយជាក្រុមហ៊ុនរថយន្តមានតម្លៃ និងល្បីឈ្មោះមួយក្នុងពិភពលោក។
ក្រៅពីនេះ នៅឆ្នាំ ២០២២ លោកបានទិញយកបណ្តាញសង្គម Twitter ដែលប្តូរឈ្មោះមកជា X ក្នុងតម្លៃ ៤៤ពាន់លានដុល្លារ។ កម្មវិធីនេះមានបញ្ហាចម្រូងចម្រាស់ បន្ទាប់ពីលោក Musk បានកែតម្រង់ប្រតិបត្តិការ និងច្បាស់ផ្សេងៗក្នុងការសម្របសម្រួលវេទិកានេះឡើងវិញ។
យោងតាមការចុះផ្សាយចុងក្រោយបង្អស់របស់ទស្សនាវដ្តី Forbes គិតត្រឹមដើមឆ្នាំ ២០២៦ នេះ លោក Elon Musk បានបំបែកកំណត់ត្រាពិភពលោកក្នុងនាមជាមហាសេដ្ឋីទី ១ ដែលមានទ្រព្យសម្បត្តិសរុបហក់ឡើងដល់ទៅ ៧១៧,៩ ពាន់លានដុល្លារ។ នេះមិនត្រឹមតែបង្ហាញពីភាពជោគជ័យផ្នែកហិរញ្ញវត្ថុរបស់លោកនោះទេ ប៉ុន្តែគឺជាសញ្ញាណនៃយុគសម័យថ្មី ដែលបច្ចេកវិទ្យា និងការច្នៃប្រឌិតមានតម្លៃខ្លាំង ដែលជាតម្រូវការបំផុតនាពេលបច្ចុប្បន្ន។