បន្ទាប់ពីអសកម្មអស់រយៈពេលជិត ៣ ទសវត្សរ៍ ពេលនេះ នាវាចម្បាំងដើរដោយថាមពលនុយក្លេអ៊ែរ Admiral Nakhimov របស់កងទ័ពជើងទឹករុស្ស៊ី បានវិលត្រឡប់មកកាន់មហាសមុទ្រវិញជាផ្លូវការហើយ ដោយក្នុងនោះ ការវិលត្រឡប់មកវិញនេះ គឺបានទាក់ទាញការចាប់អារម្មណ៍យ៉ាងខ្លាំងពីប្រទេសជាច្រើននៅជុំវិញពិភពលោក ព្រោះវាជានាវាចម្បាំងធំបំផុត និងមានសមត្ថភាពខ្លាំងបំផុតមួយរបស់រុស្ស៊ី។
គួរបញ្ជាក់ថា នាវា Admiral Nakhimov របស់រុស្ស៊ី គឺបានបង្ហាញខ្លួនជាចុងក្រោយនៅឆ្នាំ 1997 ហើយវាគឺត្រូវបានដាក់ឲជួសជុល និងធ្វើទំនើបកម្មនៅកន្លែងផលិតកប៉ាល់មួយនៅភាគខាងជើងនៃប្រទេសរុស្ស៊ី ហៅថា Sevmash ។
សម្រាប់ប្រវត្តិរបស់នាវានេះ គឺជាសមាជិកនៃក្រុមនាវា Kirov ដែលជាក្រុមនាវាយក្សសម័យសង្គ្រាមត្រជាក់ ដែលដើមឡើយត្រូវបានសាងសង់សម្រាប់កងទ័ពជើងទឹកសូវៀត។ សព្វថ្ងៃ នាវា Admiral Nakhimov នេះ គឺជានាវាតែមួយគត់ដែលនៅសេសសល់ក្នុងចំណោមនាវាទាំង 4 ដែលធ្លាប់មាន។
ចំពោះសមត្ថភាពរបស់វាវិញ គឺជានាវាចម្បាំងដែលប្រើថាមពលនុយក្លេអ៊ែរ។ វាអាចប្រតិបត្តិការលើសមុទ្របានយូរដោយមិនចាំបាច់ចាក់ប្រេង។
ជាក់ស្តែង ការធ្វើទំនើបកម្មថ្មីនេះ នាវាចម្បាំងនេះ គឺទទួលបាននូវប្រព័ន្ធបច្ចេកវិទ្យាថ្មីៗជាច្រើន ពោលគឺមានទាំងប្រព័ន្ធបាញ់មីស៊ីលបញ្ឈរចំនួន 174 កន្លែង អាចផ្ទុកមីស៊ីលវាយប្រហាររយៈចម្ងាយឆ្ងាយ Kalibr និង Oniks ជាង 80 គ្រាប់ និងមីស៊ីលការពារដែនអាកាស Fort-M និង Pantsyr-M ។ លើសពីនេះ វាក៏ទទួលបាននូវប្រព័ន្ធកាំភ្លើង AK-192M ដ៏ទំនើបផងដែរ៕