ថៃ ថា “អូមីក្រុង” នឹងមិនប៉ះពាល់ដល់ការបើកប្រទេសឡើងវិញទេ

ប្រទេសថៃ នឹងមិនបោះជំហានថយក្រោយពីផែនការបើកប្រទេសឡើងវិញនោះទេ បើទោះបីជាមានភាពមិនប្រាកដប្រជា អំពីប្រភេទជំងឺកូវីដ១៩ ថ្មី “អូមីក្រុង” ក៏ដោយ ខណៈក្រសួងទេសចរណ៍ និងកីឡាថៃ ក៏នឹងស្នើឲ្យមានការបន្ធូរបន្ថយបន្ថែមទៀត លើការលក់គ្រឿងស្រវឹងចាប់ពីពេលរសៀល ដើម្បីលើកអារម្មណ៍រីករាយឡើងវិញ។

ពាណិជ្ជកម្ម

លោក Phiphat Ratchakitprakarn ប្រធានមន្ទីរផ្នែកទេសចរណ៍ និងកីឡារបស់ប្រទេសថៃ បាននិយាយថា “គ្មាននរណាម្នាក់ចង់បានការបិទព្រំដែនទៀតនោះទេ ព្រោះវាពិតជាលំបាកណាស់សម្រាប់យើងក្នុងការបើកប្រទេសឡើងវិញ”។

លោក Ratchakitprakarn បានប្រាប់ឲ្យដឹងថា អ្នកដំណើរអន្តរជាតិក្នុងអំឡុងពេល ២៩ ថ្ងៃដំបូងនៃការបើកប្រទេសឡើងវិញ មានចំនួនជាង ១០០ ០០០ នាក់។ តួលេខ​នេះ​បាន​បង្ហាញ​ថា យុទ្ធសាស្ត្រ​គ្មាន​ការ​ដាក់ឲ្យនៅ​ដាច់​ដោយឡែក​ពី​គេ គឺជា​វិធី​ដ៏​ត្រឹមត្រូវ​ដើម្បី​ទាក់ទាញ​ភ្ញៀវ​ទេសចរឲ្យត្រលប់មកវិញ។

យ៉ាងណាមិញ ខណៈពេលដែលប្រទេសថៃ បានកត់ត្រាភ្ញៀវទេសចរចំនួនជាង ២០០ ០០០ នាក់ក្នុងរយៈពេល ១១ ខែដំបូង ក្រសួងទេសចរថៃរំពឹងថា នឹងមានភ្ញៀវទេសចរពី ៣០០ ០០០ ទៅ ៤០០ ០០០ នាក់ នឹងមកលេងប្រទេសថៃនៅចុងឆ្នាំនេះ៕