ក្រុមហ៊ុន និងអ្នកវិភាគបរទេសជាច្រើនបាននិយាយថា ទីផ្សារពាណិជ្ជកម្មអេឡិចត្រូនិករបស់វៀតណាម ដែលបច្ចុប្បន្នធំជាងគេលំដាប់ទី ៤ នៅអាស៊ីអាគ្នេយ៍ ទំនងជាអាចវ៉ាដាច់ម៉ាឡេស៊ី និងថៃ ហើយឡើងឈរនៅលំដាប់ទី២ បន្ទាប់ពីប្រទេសឥណ្ឌូនេស៊ី។
កាលពីដើមខែវិច្ឆិកាកន្លងទៅនេះ វេទិកាពាណិជ្ជកម្មអេឡិចត្រូនិក Tiki របស់ប្រទេសវៀតណាម បាននិយាយថា ខ្លួនបានរៃអង្គាសប្រាក់បាន ២៥៨ លានដុល្លារបន្ថែមទៀត ពីអ្នកវិនិយោគបរទេស រួមទាំង AIA និង Mirae Asset ផងដែរ។
គួរឲ្យដឹងថា ទីផ្សារពាណិជ្ជកម្មអេឡិចត្រូនិករបស់ប្រទេសវៀតណាម បច្ចុប្បន្នមានតម្លៃ ១៣ ពាន់លានដុល្លារក្នុងមួយឆ្នាំ ហើយនឹងកើនឡើងដល់ ៣៩ ពាន់លានដុល្លារ នៅឆ្នាំ ២០២៥ នៅពេលដែលវាស្ថិតនៅលំដាប់ទី២។ នេះបើយោងតាមរបាយការណ៍ថ្មីដោយ Google, Temasek និង Bain & Co ដែលមានចំណងជើងថា “e-Economy SEA 2021”។
ដោយឡែក ថៃ នឹងក្លាយជាប្រទេសទី៣ ដែលមានតម្លៃទីផ្សារចំនួន ៣៥ ពាន់លានដុល្លារ។ ចាប់តាំងពីការចាប់ផ្តើមនៃកូវីដ១៩ នៅដើមឆ្នាំមុន វៀតណាម បានបន្ថែមអ្នកប្រើប្រាស់ឌីជីថលថ្មីចំនួន ៨ លាននាក់ ខណៈប្រទេសថៃ ថែម ៩លាននាក់។ ប៉ុន្តែ ២៩,៣ ភាគរយ នៃប្រជាជនវៀតណាម មិនទាន់បានចូលរួមក្នុងសេដ្ឋកិច្ចឌីជីថលទេ បើធៀបនឹង ១០,១ ភាគរយ នៅក្នុងប្រទេសថៃ៕