ចក្ខុវិស័យរបស់អ្នកនាំចេញរថយន្តថៃ កាន់តែមានភាពត្រចះត្រចង់ បន្ទាប់ពីប្រទេសហ្វីលីពីនបានលុបចោលផែនការដាក់ពន្ធលើរថយន្តនាំចូលពីប្រទេសថៃ ហើយបានប្រគល់មកវិញនូវកាតព្វកិច្ចការពារ ១,២ ពាន់លានបាតដល់ក្រុមហ៊ុននាំចូលទៀតផង។
យោងតាមរដ្ឋមន្ត្រីក្រសួងពាណិជ្ជកម្មថៃ លោក Jurin Laksanawisit បានឲ្យដឹងថា ប្រទេសហ្វីលីពីនបានយល់ព្រមកាលពីថ្ងៃទី ៦ ខែសីហា ដើម្បីលុបចោលផែនការពន្ធគយ និងសងពន្ធនាំចូលវិញ បន្ទាប់ពីលោក និងមន្រ្តីផ្សេងទៀតបានដោះស្រាយបញ្ហាជម្លោះពាណិជ្ជកម្ម។
គួររំលឹកឲ្យដឹងដែរថា ប្រទេសហ្វីលីពីនបានបង្កើតគណៈកម្មាធិការមួយដើម្បីសិក្សា និងដាក់ចេញវិធានការការពារលើការនាំចេញរថយន្តដឹកអ្នកដំណើរ និងរថយន្តភីកអាប់របស់ថៃ កាលពីខែធ្នូឆ្នាំ ២០២០ ដែលនាំឱ្យមានការប្រមូលពន្ធនាំចូលលើរថយន្តដឹកអ្នកដំណើរ និងរថយន្តភីកអាប់របស់ថៃ ចាប់ពីថ្ងៃទី ១ ខែកុម្ភៈ ឆ្នាំនេះ។
កាតព្វកិច្ចនេះត្រូវបានគិតថ្លៃលើអ្នកនាំចូលហ្វីលីពីនក្នុងតម្លៃ ៤២ ០០០ បាតក្នុងមួយរថយន្តដឹកអ្នកដំណើរ និង ៦៦ ០០០ បាតក្នុងមួយរថយន្តភីកអាប់។ វាបានបណ្តាលឱ្យមានការចំណាយខ្ពស់សម្រាប់អ្នកនាំចូលហ្វីលីពីន ដោយគិតជាទឹកប្រាក់សរុបចំនួន ១,២ ពាន់លានបាតលើរថយន្តនាំចូលពីរប្រភេទនេះ។ នេះបើយោងតាមលោក Jurin។
វិធានការការពារនេះត្រូវបានគេមើលឃើញថា ជាវិធានការសងសឹកក្នុងជម្លោះពន្ធបារីដែលមានរយៈពេលយូររវាងប្រទេសទាំងពីរ។ ទោះបីជាយ៉ាងណា ប្រទេសថៃបានបង្កើតក្រុមការងារពិសេសមួយដើម្បីការពារការចោទប្រកាន់នេះហើយបានដាក់លិខិតទៅរដ្ឋមន្ត្រីក្រសួងពាណិជ្ជកម្មហ្វីលីពីន ដោយអំពាវនាវឱ្យប្រទេសជិតខាងអាស៊ានរបស់ខ្លួនគោរពច្បាប់របស់អង្គការពាណិជ្ជកម្មពិភពលោក (WTO) និងចៀសវាងការដាក់កំហិតលើការនាំចូលក្នុងទម្រង់ពន្ធបន្ថែម៕
