យោងតាមប្រភពព័ត៌មានបានឲ្យដឹងថា ក្រុមហ៊ុន TikTok បានលុបចោលគណនីជិត ៧,៣ លានគណនី ដែលសង្ស័យថាជាកម្មសិទ្ធិរបស់កុមារមិនទាន់គ្រប់អាយុនៅត្រីមាសទី ១ នៃឆ្នាំ ២០២១ នេះ។
ក្រុមហ៊ុនវេទិកាចែករំលែកវីដេអូខាងលើបាននិយាយថា ចំនួនគណនីដែលត្រូវបានលុបចោលទាំងនោះមានចំនួនតិចជាង ១% នៃអ្នកប្រើប្រាស់ទូទាំងពិភពលោក។
គួរឲ្យដឹងដែរថា កុមារដែលមានអាយុចាប់ពី ១៣ ឆ្នាំឡើងទៅ ទើបត្រូវបានអនុញ្ញាតឲ្យប្រើប្រាស់កម្មវិធី Tiktok ដែលជាការពេញនិយមយ៉ាងខ្លាំងចំពោះក្មេងជំទង់។
យ៉ាងណាមិញ វាគឺជាលើកទីមួយហើយដែលក្រុមហ៊ុន TikTok បានផ្សព្វផ្សាយតួលេខបែបនេះ នៅក្នុងរបាយការណ៍ស្តីពីការអនុវត្តគោលការណ៍សហគមន៍ (Community Guidelines Enforcement Report)។
ក្រុមហ៊ុន TikTok បានឲ្យដឹងថា ខ្លួនសង្ឃឹមថាព័ត៌មានលម្អិតអំពីអ្នកប្រើប្រាស់មិនទាន់គ្រប់អាយុ នឹងជួយឲ្យឧស្សាហកម្មនេះឈានទៅមុខនៅពេលមានតម្លាភាព និងគណនេយ្យភាពជុំវិញសុវត្ថិភាពអ្នកប្រើប្រាស់៕