HungryPanda គឺជាក្រុមហ៊ុនដឹកជញ្ជូនម្ហូបអាហារ និងគ្រឿងទេសឈានមុខគេមួយដែលត្រូវបានបង្កើតឡើងដោយនិស្សិតជនជាតិចិនលោក Kelu “Eric” Liu នៅក្នុងឆ្នាំ ២០១៧។ ខណៈពេលដែលលោកជាកំពុងសិក្សាបញ្ចប់ផ្នែកវិទ្យាសាស្រ្តកុំព្យូទ័រ នៅសកលវិទ្យាល័យ Nottingham ចក្រភពអង់គ្លេស។
ការបង្កើតក្រុមហ៊ុននេះគឺកើតចេញពីបញ្ហាតូចមួយដែលលោក Liu ជួបប្រទះផ្ទាល់ក្នុងនាមជានិស្សិតរស់នៅក្រៅប្រទេសគឺ ភាពលំបាកក្នុងការស្វែងរកម្ហូបអាស៊ី និងម្ហូបចិន តាមរយៈក្រុមហ៊ុនដឹកជញ្ជូនក្នុងប្រទេសអង់គ្លេស។ លោកបានកត់សម្គាល់ថា វេទិកាទាំងនោះច្រើនតែមានការបកប្រែឈ្មោះម្ហូបមិនត្រឹមត្រូវ បូករួមគុណភាព និងរសជាតិម្ហូបមិនដូចដើម។
ដូច្នេះ ទើបលោកសម្រេចចិត្តបង្កើតវេទិកានេះឡើង ដោយដំបូងគ្រាន់តែជាគម្រោង ការងារសម្រាប់សាកលវិទ្យាល័យប៉ុណ្ណោះ។ លោក Liu ចាប់ផ្តើមអ្វីៗគ្រប់យ៉ាងដោយខ្លួនឯង តាំងពីប្រតិបត្តិការប្រព័ន្ធ រហូតដល់ការដឹកជញ្ជូនផ្ទាល់ ដើម្បីស្វែងយល់ពីតម្រូវការស៊ីជម្រៅរបស់អតិថិជន។
ខុសពីក្រុមហ៊ុនដទៃ HungryPanda ផ្តោតទៅលើអតិថិជនគោលដៅដែលជាជនជាតិអាសុី ជាពិសេសគឺជនជាតិចិន។ ពួកគេប្រើប្រាស់តួអក្សរចិនសម្រាប់ Menu ក្នុង App ទាំងម្ហូប គ្រឿងទេស និងសេវាកម្មទូទាត់ប្រាក់ ដូចជា WeChat Pay ឬ Alipay ដែលផ្តល់នូវអារម្មណ៍ដូចនៅប្រទេសខ្លួន។ ទាំងអស់នេះបាន ទាក់ទាញជនជាតិអាសុីជាច្រើនមកប្រើប្រាស់កម្មវិធីរបស់ពួកគេ។ ក្នុងរយៈពេលប្រមាណ ២សប្តាហ៍ ក្រុមហ៊ុនមានសមត្ថភាពក្នុងការចាប់ផ្តើមប្រតិបត្តិការនៅក្នុងទីក្រុងថ្មីបន្ថែមទៀត។
គិតត្រឹមឆ្នាំ ២០២៣ ក្រុមហ៊ុន HungryPanda បានពង្រីកប្រតិបត្តិការរបស់ខ្លួនទៅជាង ៨០ទីក្រុង ក្នុង ១០ប្រទេស រួមមាន ចក្រភពអង់គ្លេស សហរដ្ឋអាមេរិក កាណាដា អូស្ត្រាលី នូវែលសេឡង់ បារាំង អ៊ីតាលី ជប៉ុន កូរ៉េខាងត្បូង និងសិង្ហបុរី។ បន្ថែមពីលើការដឹកជញ្ជូន ម្ហូបអាហារ ក្រុមហ៊ុនក៏បានបង្កើតវេទិកាផ្សេងទៀតដូចជា PandaFresh និង VouchersPanda។
ជាលទ្ធផល លោក Eric Liu ត្រូវបានគេទទួលស្គាល់ថាជាសហគ្រិនវ័យក្មេងដ៏ឆ្នើមម្នាក់ ដោយបានជាប់ក្នុងបញ្ជី Forbes Under 30 Europe ឆ្នាំ ២០២៣។ គិតត្រឹមពេលនោះ ក្រុមហ៊ុន HungryPanda បានកៀរគរទុនវិនិយោគសរុបជាង ២២០ លានដុល្លារ។ លោក Eric Liu បានបង្ហាញឲ្យឃើញថា អាជីវកម្មជោគជ័យមិនចាំបាច់ប្រកួតប្រជែងលើទីផ្សារធំទូលាយនោះទេ ប៉ុន្តែត្រូវស្វែងរកដំណោះស្រាយជាក់លាក់មួយ ដើម្បីដោះស្រាយបញ្ហាដែលកំពុងជួបប្រទះសម្រាប់អតិថិជន។