បន្ទាប់ពីបានក្លាយជាតួអង្គសំខាន់ជាងគេនៅក្នុងការបណ្តុះបណ្តាលបច្ចេកវិទ្យា AI អស់រយៈពេលជាច្រើនឆ្នាំ ពេលនេះ GPU លែងជាឧបសគ្គចម្បងនៅក្នុងការបណ្តុះបណ្តាលបច្ចេកវិទ្យា AI ទៀតហើយ ដោយក្នុងនោះ បញ្ហាថ្មីដែលសំខាន់នៅក្នុងការបណ្តុះបណ្តាលបច្ចេកវិទ្យា AI នាពេលបច្ចុប្បន្ននេះ គឺការខ្វះខាតនូវប្រព័ន្ធផ្គត់ផ្គង់អគ្គិសនី។ នេះបើយោងតាមការបកស្រាយមួយនៅក្នុងកម្មវិធី Podcast របស់នាយកប្រតិបត្តិរបស់ក្រុមហ៊ុន Microsoft គឺលោក Satya Nadella ។
ក្នុងនោះ លោក Satya Nadella ផ្ទាល់គឺបានលើកឡើងថា ចំពោះមូលហេតុដែលនាំឲមានការខ្វះខាតនូវប្រព័ន្ធផ្គត់ផ្គង់អគ្គិសនីសម្រាប់ដំណើរការទៅលើមជ្ឈមណ្ឌលទិន្នន័យ AI គឺដោយសារតែការកើនឡើងនៃតម្រូវការថាមពលយ៉ាងច្រើននៅក្នុងការបណ្តុះបណ្តាលបច្ចេកវិទ្យា AI ពេលបច្ចុប្បន្ននេះ ជាពិសេសគឺការបណ្តុះបណ្តាលម៉ូឌែល AI ធំៗ។
គួរបញ្ជាក់ថា ដើម្បីដោះស្រាយនូវបញ្ហាថ្មីនេះ ក្រុមហ៊ុនបច្ចេកវិទ្យាជាច្រើនទាំង Microsoft ក៏កំពុងរៀបចំនូវផែនការថ្មីដើម្បីសាងសង់នូវមជ្ឈមណ្ឌលទិន្នន័យនៅជិតប្រភពអគ្គិសនីធំៗ រួមជាមួយការចុះនូវកិច្ចព្រមព្រៀងផ្គត់ផ្តង់ថាមពលរយៈពេលវែង ក៏ដូចជាការសាងសង់នូវមជ្ឈមណ្ឌលទិន្នន័យ AI នៅលើលំហផងដែរ៕