ជឿជាក់ថា បងប្អូនប្រាកដជាធ្លាប់បានឮ និងឃើញពីសូកូឡាដែលល្បីល្បាញពេញបណ្តាសង្គម “Dubai Chocolate”។ សូកូឡានេះត្រូវបានបង្កើតឡើងដោយ Sarah Hamouda ដែលជាស្ថាបនិក និងជាម្ចាស់ម៉ាកយីហោ FIX Dessert Chocolatier។
តាមពិតទៅ ឈ្មោះដើមរបស់សូកូឡានេះគឺ “Can’t Get Knafeh of It” ប៉ុន្តែដោយសារផលិតនៅក្នុងប្រទេសអារ៉ាប់រួម (UAE) ទើបជាប់ឈ្មោះជា Dubai Chocolate។ រូបមន្តរបស់សូកូឡានេះ កើតចេញពីគំនិតរបស់ Sarah អំឡុងពេលកំពុងពរពោះ និងមានអារម្មណ៍ឃ្លានរបស់ប្លែកៗ។ រូបមន្តពិសេសនេះរួមបញ្ចូលគ្នានូវស្នូលគ្រីមគ្រាប់រីករាយ និង knafeh ស្រួយៗ។
Sarah Hamouda បានបង្កើត FIX Dessert Chocolatier ជាអាជីវកម្មទីមួយរបស់ខ្លួនតាំង ពីឆ្នាំ ២០២១ មកម្ល៉េះ បន្ទាប់ពីលាឈប់ពីការងារ។ ក្នុងឆ្នាំដំបូងៗ ម៉ាកយីហោនេះមិនទាន់ត្រូវបានគេស្គាល់ទូលំទូលាយនោះទេ ហើយការកុម្ម៉ង់ក៏ស្ទើរតែគ្មាន។ ភាពមិនល្អប្រសើរនេះបានធ្វើឲ្យ Sarah អស់សង្ឃឹម និងគិតចង់បោះបង់ចោលអាជីវកម្មជាច្រើនដង ក៏ព្រោះតែកត្តាចម្បងគឺការខ្វះខាតថវិកាក្នុងការបន្តទៀត។
បីឆ្នាំក្រោយមក នៅដើមឆ្នាំ ២០២៤ Dubai Chocolate បានផ្លាស់ប្តូរជោគវាសនារបស់ខ្លួនទាំងស្រុង។ ភាពល្បីល្បាញបានផ្ទុះឡើងខ្លាំងបន្ទាប់ពីគណនី TikTok ឈ្មោះ Maria Vehera បានបង្ហោះវីដេអូសូកូឡា ដែលទទួលបានអ្នកចូលមើលដល់ទៅ ១២០លានដង ក្នុងរយៈ ពេលដ៏ខ្លី។ ចំណែក ក្នុងពេលត្រឹមតែ ១ម៉ោង ពួកគេទទួលបានការកុម្មង់ដល់ទៅ ៣០,០០០ ដុំ។
នឹកស្មានមិនដល់នោះគឺ ត្រឹមតែ ១១ថ្ងៃ ១.២លានដុំ ត្រូវបានលក់ និងផ្ញើចេញទៅគ្រប់បណ្តាប្រទេស រហូតដល់ដាច់ស្តុក និងកំណត់ម្នាក់ទិញបានតែ ១ដុំប៉ុណ្ណោះ។ នេះមិនមែនជាផលិតផលថ្មីទេ តែជាផលិតផលចំណាយពេល ៣ឆ្នាំ ជាមួយនឹងការខំប្រឹងប្រែង ក្តីសង្ឃឹមកន្លងមករបស់ Sarah រួមទាំង ក្រុមការងារ ក្នុងការទទួលបានភាពជោគជ័យមួយដ៏នឹកស្មានមិនដល់។
Sarah Hamouda ក៏បានចែករំលែកសារខ្លះៗ ដល់ម្ចាស់អាជីវកម្មនោះគឺ ត្រូវជឿជាក់ទៅលើផលិតផលរបស់ខ្លួន ត្រូវមានការអត់ធ្មត់ ការតាំងចិត្ត និងចំណាយខ្ពស់ ព្រោះថាផ្លូវមួយនេះគឺត្រូវការពេលវេលាយូរទម្រាំតែទទួលបានលទ្ធផលដែលសមប្រកប និងសមតាមបំណង។