បច្ចុប្បន្ននេះ ផលិតផលខ្មែរជាច្រើនកំពុងចរាចរយ៉ាងសកម្មនៅក្នុងទីផ្សារ ជាមួយនឹងការគាំទ្រលើសលប់ពីប្រជាជនខ្មែរ។ ជាក់ស្តែង ផលិតផលខ្មែរ ទាំងការវេចខ្ចប់ គុណភាពគឺមិនធម្មតានោះទេ។ នេះជាក្រុមហ៊ុន Confirel ខនហ្វីរេល ដែលមានលោកឧកញ៉ាឱសថបណ្ឌិត ហៃលីអ៊ាង ជាស្ថាបនិក និងជាប្រធានអគ្គនាយក។
ក្រុមហ៊ុន Confirel បង្កើតឡើងអំឡុងឆ្នាំ ២០០១ ដែលចាត់ទុកជាក្រុមហ៊ុនមានជំនាញកែច្នៃកសិផលក្នុងស្រុក ឲ្យក្លាយជាផលិតផលស្តង់ដារគុណភាព។ គោលជំហរក្រុមហ៊ុនគឺបង្កើត និងលើកតម្កើងអត្តសញ្ញាណខ្មែរ កសិផលខ្មែរ ប្រើប្រាស់វត្ថុធាតុដើមក្នុងស្រុកមកផលិត។ ជាក់ស្តែង បានប្រើប្រាស់ផ្លែត្នោតខេត្តកំពង់ស្ពឺ និងម្រេចខេត្តកំពត យកមកកែច្នៃចេញជាផលិតផលដែលមានគុណភាពសម្រាប់ប្រើប្រាស់ក្នុងស្រុក និងនាំចេញទៅក្រៅប្រទេស។
គួរបញ្ជាក់ផងថា ផលិតផលសម្រេចទាំងអស់របស់ក្រុមហ៊ុន Confirel ស្ថិតនៅក្រោមម៉ាកយីហោធំៗ ៤គឺ ១) ចាយ៉ា (Jaya) ដែលច្នៃទឹកត្នោតធម្មជាតិ ទៅជាស្រាត្នោត។ ២) ត្នោត (Thnot) ផ្តោតទៅលើការកែច្នៃត្នោត ជាមួយផ្លែឈើដទៃទៀត ទៅជាផលិតផលបានជាង ៤០មុខ។ ៣) គីរម្យ (Kirum) ផលិតផលម្រេចកំពត មានដូចជា ម្រេចខ្មៅ ស ក្រហម តែកញ្ចុំផ្កាម្រេច ៨ រសជាតិ និងម្សៅប្រហុក។ ៤) ខេម ប្រូបាយ អូទិក (KEM Probiotics) ជាអាហារបំប៉នសុខភាព។
ជាង ២ ទសវត្សរ៍ ក្នុងការផលិត និងជួយលើកតម្កើងកសិផលខ្មែរ ក្រុមហ៊ុនទទួលបានលិខិតសរសើរ និងពានរង្វាន់បញ្ជាក់ពីគុណភាពផលិតផលជាហូរហែរ។ ជាពិសេស ទទួលស្គាល់ដោយស្ថាប័ននៅកម្ពុជា និងបរទេស ដែលធ្វើឲ្យ Confirel បាននាំចេញទៅកាន់សហរដ្ឋអាមេរិក ជប៉ុន វៀតណាម បារាំង និងប្រទេសផ្សេងៗទៀត។ នេះមិនត្រឹមតែជាភាពជោគជ័យរបស់ក្រុមហ៊ុនទេ ប៉ុន្តែជាការបង្ហាញនូវមុខមាត់ សមត្ថភាពផលិត និងគុណភាពរបស់ផលិតផលខ្មែរឲ្យពិភពលោកបានស្គាល់ផងដែរ។