Buldak គឺជាមីហិលកូរ៉េដែលផ្ទុះខ្លាំងពីប៉ុន្មានឆ្នាំមុន ជាផលិតផលរបស់ក្រុមហ៊ុន Samyang Foods។ មិនមែនជាក្រុមហ៊ុនថ្មីនោះទេ តែជាក្រុមហ៊ុនផលិតមីវ័យចំណាស់មួយនៅប្រទេសកូរ៉េខាងត្បូង ដែលចាប់ផ្តើមតាំងពីឆ្នាំ ១៩៦៣ មកម្ល៉េះ។
Buldak ត្រូវបានប្រកាសចេញលក់ដោយលោកស្រី Kim Jung-soo ដែលជានាយិកាប្រតិបត្តិថ្មី នៅអំឡុងឆ្នាំ ២០១២។ ផលិតផលថ្មីនេះ ត្រូវបានរំពឹងទុកថាទទួលបានជោគជ័យ អាចទាញយកទីផ្សារមកវិញបាន ផ្ទុយទៅវិញ មិនសូវទទួលបានការចាប់អារម្មណ៍ពីទីផ្សារក្នុងស្រុកនោះទេ។
ទើបនៅឆ្នាំ ២០១៤ មីហិលនេះចាប់ផ្តើមល្បីខ្លាំងព្រោះតែវីដេអូមួយនៅលើ YouTube ដែលគេស្គាល់ថា “Fire Noodle Challenge”។ ភាពល្បីល្បាញភ្លាមៗរបស់វីដេអូនេះ បានធ្វើឲ្យមីហិល Buldak ចាប់ផ្តើមល្បីសុសសាយពេញពិភពលោក និងមានមនុស្សជាច្រើនចូលរួមលេង Challenge មួយនេះ។ ភាពជោគជ័យលើសពីការរំពឹងទុកនេះ ជួយស្រោចស្រង់ឲ្យក្រុមហ៊ុន Samyang Foods រួចផុតពីការក្ស័យធន និងអាចឈរជើងបានយ៉ាងរឹងមាំនៅលើក្នុងទីផ្សារអន្តរជាតិឡើងវិញ។
ក្រៅពីនេះ ក្រុមហ៊ុនក៏បានបង្ហាញមហិច្ឆតាថ្មីរបស់ខ្លួន ដោយបានសហការជាមួយក្រុមហ៊ុនចិន បង្កើតជារោងចក្រក្រៅប្រទេសដំបូងបង្អស់របស់ខ្លួននៅខេត្ត Zhejiang ជាមួយទំហំទឹកប្រាក់វិនិយោគដ៏ធំរហូតដល់ ១៤៥ លានដុល្លារអាមេរិកថែមទៀតផង។
បច្ចុប្បន្ន Samyang Foods នៅតែរក្សាកេរ្តិ៍ឈ្មោះនៅលើទីផ្សារទាំងក្នុងស្រុក និងអន្តរជាតិ។ មិនតែប៉ុណ្ណោះ ពួកគេក៏ពង្រីកការផលិត បន្ថែមផលិតផលថ្មី និងបង្កើតបាននូវរសជាតិមី Buldak ប្លែកៗរហូតដល់ទៅ ១១ រសជាតិផ្សេងទៀត ដើម្បីបំពេញតម្រូវការទីផ្សារ។