អាយប៊ីសរ៉ាយស៍ – Ibis Rice គឺជាក្រុមហ៊ុនក្នុងស្រុក ដែលមានបេសកម្មចម្បងគឺការអភិរក្សសត្វព្រៃ និងព្រៃឈើដែលកំពុងរងការគំរាមកំហែង នៅតាមតំបន់ដែនជម្រកសត្វព្រៃក្នុងប្រទេសកម្ពុជា។
គម្រោងនេះ ត្រូវបានបង្កើតតាំងពីឆ្នាំ ២០០៩ ដោយអង្គការ Wildlife Conservation Society – WCS ដែលជាសមាគមអភិរក្សសត្វព្រៃជិតផុតពូជមួយ។ ចំណែកក្រុមហ៊ុន អាយប៊ីសរ៉ាយស៍ – Ibis Rice ផ្តោតសំខាន់ទៅលើការផលិតអង្ករផ្កាម្លិះ និងសរីរាង្គ ដែលមានគុណភាពខ្ពស់។ ភាគច្រើន ផលិតផលពួកគេ តែងតែមានលក់នៅតាមផ្សារទំនើប និងម៉ាតមួយចំនួនក្នុងប្រទេស។
មិនត្រឹមតែប៉ុណ្ណោះ តាមរយៈគម្រោងនេះ ក៏បានជួយដល់ជីវភាពកសិករក្នុងតំបន់មួយចំនួន ពីការប្រមូលទិញកសិផលស្រូវពីពួកគាត់ផងដែរ។ កន្លងមកនេះ បានអនុវត្តនៅខេត្តព្រះវិហារ ស្ទឹងត្រែង រតនគិរី និងមណ្ឌលគិរី សហការជាមួយនឹងកសិករនៅទីនោះផ្ទាល់ដោយការធ្វើកសិកម្មតាមគោលការណ៍បែបសរីរាង្គ ផ្តល់ជូននូវទីផ្សារលក់ច្បាស់លាល់ ទទួលបាននូវតម្លៃខ្ពស់សមរម្យ។
សព្វថ្ងៃនេះ ក្រុមហ៊ុនបានផលិត និងវិចខ្ចប់ចេញជា អង្ករសរីរាង្គ អង្ករសំរូប អង្ករផ្កាម្លិះ នំអង្ករបន្ទះ និងស្រាអង្ករជាដើម។ រាល់ផលិតផលទាំងអស់ មានការទទួលស្គាល់ និងបញ្ជាក់យ៉ាងត្រឹមត្រូវពីស្តង់ដារគុណភាព និងសុវត្ថិភាពក្នុងការទទួលទាន។
ផលិតផល អាយប៊ីសរ៉ាយស៍ – Ibis Rice បានចែកចាយនៅតាមផ្សារទំនើបក្នុងប្រទេស។ មិនតែប៉ុណ្ណោះ ក៏បាននាំចេញទៅកាន់ទីផ្សារអន្តរជាតិ នៅតាមបណ្តាប្រទេសក្នុងសហភាពអឺរ៉ុប សហរដ្ឋអាមេរិក កាណាដា សិង្ហបុរី។ល។ ចូលរួមគាំទ្រផលិតផលក្នុងស្រុក ប្រៀបបាននឹងការជួយដល់ជីវភាពកសិករ ចូលរួមការពារនូវធនធានធម្មជាតិ និងការលើកស្ទួយផលិតផលជាតិផងដែរ។