បន្ទាប់ពីទំនាក់ទំនងពាណិជ្ជកម្មរវាងសហរដ្ឋអាមេរិក និងប្រទេសចិន បានប្រឈមមុខនឹងភាពតានតឹងយ៉ាងខ្លាំងក្នុងរយៈពេលប្រាំពីរឆ្នាំចុងក្រោយនេះ ទំហំការនាំចូលរបស់សហរដ្ឋអាមេរិកពីប្រទេសចិនបានថយចុះជាងពាក់កណ្តាលឯណ្ណោះ ដោយក្នុងនោះនៅក្នុងឆ្នាំ២០២៥នេះ គឺមានត្រឹមតែ 195ពាន់លានដុល្លារប៉ុណ្ណោះ។
ពាណិជ្ជកម្ម
បើប្រៀបធៀបនឹងឆ្នាំ 2018 ទំហំការនាំចូលរបស់សហរដ្ឋអាមេរិកពីប្រទេសចិន គឺបានថយចុះជាងពាក់កណ្តាលឯណ្ណោះ ពោលគឺមានការធ្លាក់ចុះពីចំនួនជិត 300ពាន់លានដុល្លារក្នុងមួយឆ្នាំ ក្នុងឆ្នាំ២០១៨ មកត្រឹមតែ 195ពាន់លានដុល្លារប៉ុណ្ណោះ នៅក្នុងឆ្នាំ2025 នេះ។
ចំពោះមូលហេតុនៃការធ្លាក់ចុះនេះ គឺដោយសារតែសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិន ក្នុងអំឡុងអាណត្តិដឹកនាំរបស់ប្រធានាធិបតីលោក Donald Trump ។
ក្នុងនោះ បើយោងតាមរបាយការណ៍របស់គេហទំព័រ Forbes កាលពីថ្ងៃទី 21 តុលា ឆ្នាំ 2025 បានបញ្ជាក់ថា ក្នុងចំណោមទំនិញ ១០ប្រភេទដែលសហរដ្ឋអាមេរិកធ្លាប់នាំចូលច្រើនបំផុតពីប្រទេសចិននៅឆ្នាំ 2018 មានចំនួនដល់ទៅ ៨ប្រភេទឯណ្ណោះ ដែលបានធ្លាក់ចុះលើសពី ៥០% ។ ក្នុងចំណោមទំនិញទាំងនោះរួមមាន ទូរស័ព្ទ កុំព្យូទ័រ គ្រឿងកុំព្យូទ័រ គ្រឿងសង្ហារិម កៅអី និងអំពូល។
គួរបញ្ជាក់ថា ជំនួសឲ្យការនាំចូលពីចិន សហរដ្ឋអាមេរិកក៏បានប្ដូរទិសដៅនាំចូលរបស់ខ្លួនទៅកាន់ប្រទេសដទៃជាច្រើនដូចជា វៀតណាម ឥណ្ឌា តៃវ៉ាន់ ម៉ាឡេស៊ី និងម៉ិកស៊ិកផងដែរ៕