WhatsApp ជាកម្មវិធីទំនាក់ទំនងមួយដែលស្រដៀងនឹង Messenger, Telegram មានមនុស្សប្រើប្រាស់រាប់លាននាក់នៅលើពិភពលោក។ កម្មវិធីនេះត្រូវបានបង្កើតឡើងនៅក្នុងឆ្នាំ ២០០៩ ដោយលោក Jan Koum និងលោក Brian Acton។
មុននឹងបង្កើតកម្មវិធីនេះឡើងមក អ្នកទាំងពីរធ្លាប់ជាបុគ្គលិករបស់ក្រុមហ៊ុន Yahoo! ជាង ១០ ឆ្នាំមកហើយ។ ទើបនៅឆ្នាំ ២០០៧ ក៏បានលាឈប់ រួចក៏ដាក់ពាក្យទៅក្រុមហ៊ុន Facebook ប៉ុន្តែត្រូវបានគេបដិសេធ។ លោក Jan Koum ក៏មានគំនិតក្នុងការបង្កើតកម្មវិធីថ្មីមួយដែលអាចបង្ហាញពីស្ថានភាពជាក់ស្តែងទៅកាន់មិត្តភក្តិ និងគ្រួសារ។
ការបង្កើតកម្មវិធីនេះ លោកបានសហការជាមួយនឹងជនជាតិរុស្សី ដែលជាអ្នកជំនាញសរសេរកម្មវិធីម្នាក់។ នៅខែឧសភា ឆ្នាំ២០០៩ WhatsApp ត្រូវបានដាក់ឲ្យប្រើប្រាស់ជាផ្លូវការ។ ពេលដាក់ចេញដំបូង កម្មវិធីនេះមានបញ្ហាជាច្រើនដង ទាក់ទងនឹងបញ្ហាបច្ចេកទេស ដែលធ្វើឲ្យចំនួនអ្នកប្រើប្រាស់ធ្លាក់ចុះជាហូរហែរ។
លុះដល់ពេលដែល Apple ចេញនូវមុខងារថ្មី Push Notifications ដែលជាសារជូនដំណឹងផ្សេងៗក្នុងទូរស័ព្ទ។ លោក Jan Koum ក៏បានប្រើប្រាស់មុខងារនេះនៅក្នុងកម្មវិធីខ្លួន ជាមួយនឹងការកែលម្អផ្សេងៗទៀត។ នៅអំឡុងឆ្នាំ ២០១០ កម្មវិធី WhatsApp បានបន្ថែមនូវមុខងារផ្ញើសារជាក្រុម ជាមួយនឹងមុខងារជាច្រើនទៀត។
ការកែប្រែទាំងអស់នេះហើយ កាន់តែធ្វើឲ្យ WhatsApp ក្លាយជាតម្រូវការសំខាន់មួយសម្រាប់ការទំនាក់ទំនងគ្នា និងក្លាយជាកម្មវិធីទំនាក់ទំនងដ៏ល្បីល្បាញបំផុតមួយនៅលើពិភពលោក។ នៅឆ្នាំ ២០១៤ វិញ WhatsApp ត្រូវបានទិញយកដោយក្រុមហ៊ុន Facebook ក្នុងតម្លៃ ១៩ ពាន់លានដុល្លារ ដែលការទិញយកមួយនេះ ក្លាយជាទីចាប់អារម្មណ៍នៅក្នុងពិភពបច្ចេកវិទ្យា។
បើងាកមកមើលបច្ចុប្បន្ននេះវិញ WhatsApp មានអ្នកប្រើប្រាស់ចន្លោះ ៣.១ ពាន់លាននាក់ទៅ ៣.២ ពាន់លាននាក់ក្នុងឆ្នាំ ២០២៥។ ក្នុងនោះ ឥណ្ឌាជាប្រទេសដែលមានអ្នកប្រើប្រាស់ច្រើនជាងគេដល់ទៅជាង ៥៣៥ លាននាក់។