ស្ករចេក គឺជាផលិតផលខ្មែរយើងមួយ ដែលបានកែច្នៃពីផ្លែចេកទុំ ទៅជាស្ករ អាចទទួលទានដូចស្ករទូទៅដែរ។ បច្ចុប្បន្នត្រូវបានផលិតឡើងដោយ សហគ្រាសមួយស្ថិតនៅស្រុកចំការលើគឺ សហគ្រាស គំនិតថ្មី។
សហគ្រាសគំនិតថ្មី ជាសហគ្រាសបង្កើតឡើងដោយកូនខ្មែរ នៅក្នុងឆ្នាំ ២០១៣។ មកដល់ឥឡូវនេះចូល ១២ឆ្នាំហើយ។ ការចាប់ផ្តើមគំនិតអាជីវកម្មមួយនេះគឺ ខណៈពេលដែលទិន្នផលផ្លែចេកនៅតំបន់មួយចំនួននៅស្រុកចំការលើ មិនមានទីផ្សារ និងសល់ច្រើនទុំចោលពេញចំការ។ ដូច្នេះទើបបំផុសឲ្យមានគំនិតប្លែកក្នុងការកែច្នៃ ដើម្បីបង្កើតបានទីផ្សារនាំចេញថ្មីមួយ ដែលជួយកាត់បន្ថយការខាតបង់របស់កសិករ និងអាចបង្កើតការងារដល់អ្នកស្រុកភូមិរកកម្រៃបានបន្ថែមទៀត។
ការផលិតស្ករចេកនេះ ចំណាយពេលស្រាវជ្រាវជិត ២ឆ្នាំ ក្នុងការកែច្នៃរូបមន្ត ដើម្បីទទួលបានរសជាតិប្លែកខុសពីគេ។ សម្រាប់ស្ករប្រភេទនេះ អាចប្រើប្រាស់ជាគ្រឿងទេស លាយជាមួយតែ ឬកាហ្វេបាន។ ចំណែកផ្លែចេក ដែលជាវត្ថុធាតុដើម ភាគច្រើនប្រមូលពីកសិករក្នុងស្រុកចំការលើ និងមួយចំនួនទៀតទិញពីខេត្តផ្សេងៗ។ សព្វថ្ងៃនេះ សហគ្រាសផលិតបានប្រមាណជិត ៣០មុខ មានជាប្រភេទស្ករ ដំណាប់ និង ស្រាជាដើម។
ពិតជាគួរឲ្យសរសើរនូវគំនិត ដែលប្រើប្រាស់ផ្លែឈើចេញជាផលិតផលថ្មីប្លែកមួយនៅលើទីផ្សារ។ បច្ចុប្បន្ននេះមានលក់នៅតាមផ្សារទំនើបតូចធំ ក៏ដូចជាផ្សារសហគមន៍នានាក្នុងប្រទេស។ ដូច្នេះហើយ ការគាំទ្ររបស់បងប្អូនទៅលើកសិផលក្នុងស្រុក គឺជាសកម្មភាពមួយក្នុងការចូលរួមលើកស្ទួយសេដ្ឋកិច្ចកសិករ ពាណិជ្ជករ និងសង្គមជាតិបន្ថែមទៀត។