ក្រុមហ៊ុន Ly Ly Food Industry Co., Ltd ត្រូវបានបង្កើតឡើងក្នុងឆ្នាំ ២០០២ ដោយលោកជំទាវឧកញ៉ា កែវ មុំ ដែលស្គាល់ជារោងចក្រផលិតនំកញ្ចប់ដំបូងគេមួយនៅកម្ពុជា។
ក្រុមហ៊ុនលីលី បង្កើតឡើងដំបូងជាសិប្បកម្មខ្នាតតូច មានបុគ្គលិកប្រហែល ២០ ទៅ ៣០នាក់ប៉ុណ្ណោះ។ មូលហេតុនៅពីក្រោយការបង្កើតក្រុមហ៊ុននេះ ព្រោះតែនៅខ្មែរយើងមានភាពខ្វះខាតការផលិតនំកញ្ចប់ ភាគច្រើននាំចូលពីបរទេស។ ដូច្នេះ ទើបលោកស្រីចាប់ផ្តើមស្វែងរកដៃគូអាជីវកម្ម រួមទាំងលក់ផ្ទះផ្ទាល់ខ្លួនមកធ្វើជាដើមទុន ក្នុងការបង្កើតសហគ្រាសនេះឡើងមក។
នេះជាការវិនិយោគដ៍ធំមួយ ក្នុងការផលិតអាហារសម្រន់ដែលជាផលិតផលខ្មែរ ប្រើប្រាស់នូវបច្ចេកវិទ្យាទំនើបៗក្នុងការផលិត ប្រើប្រាស់នូវវត្ថុធាតុដើមមានគុណភាព និងឆ្លងកាត់ការពិសោធន៍មុននឹងចេញលក់លើទីផ្សារ។ ដើម្បីធានារសជាតិ សុវត្ថិភាព និងគុណភាពស្តង់ដារមួយត្រឹមត្រូវ។
បច្ចុប្បន្ន សហគ្រាសផលិត និងកែច្នៃអាហារសម្រន់បានប្រមាណ ៤០មុខ កំពុងមានលក់នៅលើទីផ្សារ។ ចំណែកផលិតផលទាំងអស់នេះ មិនត្រឹមតែផលិតសម្រាប់ផ្គត់ផ្គង់ក្នុងស្រុកនោះទេ ថែមទាំងសម្រាប់នាំចេញទៅក្រៅប្រទេសផងដែរ។ កន្លងមកនេះ បាននាំចេញទៅកាន់ ១៣ ប្រទេសរួចមកហើយ។ ជាងនេះទៅទៀត ក្រុមហ៊ុននំស្រួយលីលី ក៏បានទាក់ទាញចំណាប់អារម្មណ៍ក្រុមហ៊ុនផលិតនំកញ្ចប់នៅប្រទេសជប៉ុន មកចាប់ដៃគូវិនិយោគជាមួយបង្កើតបានជាក្រុមហ៊ុនថ្មីមួយឈ្មោះ លីលីខាមេដា។
នេះជាសមិទ្ធផលមួយ ដែលក្រុមហ៊ុននំស្រួយលីលី បានកសាងឡើងរយៈពេលជាង ២០ឆ្នាំមកនេះ ជាគោលដៅមួយដែលក្រុមហ៊ុនចង់នាំចេញផលិតផលខ្មែរទៅកាន់ទីផ្សារអន្តរជាតិ។ លោកស្រីតែងតែចែករំលែកថា ការធ្វើអ្វីមួយ ត្រូវដាក់ចិត្ត ដាក់កាយធ្វើវា កុំធ្វើលំៗ។ ព្រោះការបង្កើតអាជីវកម្មមួយស្រួលទេ តែអ្វីដែលពិបាកគឺ ការធ្វើឲ្យអាជីវកម្មរីកចម្រើន ដែលតម្រូវឲ្យមានការតស៊ូប្តេជ្ញាចិត្ត ហើយធ្វើវាដោយម៉ត់ចត់ ទើបអាចដើរទៅមុខរួចបាន។