BYD ជាម៉ាករថយន្តអគ្គិសនីដ៏ល្បីល្បាញ និងកំពុងតែពេញនិយមមួយត្រូវបានបង្កើតឡើងតាំងពីឆ្នាំ ១៩៩៥ ដោយលោក Wang Chuanfu។ ទម្រាំតែទទួលបានភាពជោគជ័យដូចសព្វថ្ងៃនេះ ខ្សែជីវិតលោកគឺមានប្រវត្តិជូរចត់ស្ទើរតែមិនគួរឲ្យជឿ។
លោកកើតនៅឆ្នាំ ១៩៦៦ ជាអតីតក្មេងកំព្រា ដែលមានគ្រួសារជាកសិករ រស់នៅក្នុងតំបន់ដាច់ស្រយាលមួយនៃខេត្តអានហ៊ួយ ប្រទេសចិន។ លោក Wang បាត់បង់ឪពុកម្តាយពេលកំពុងរៀននៅមធ្យមសិក្សា និងមករស់នៅជាមួយបងប្រុស និងបងថ្លៃ ដែលជាអ្នកទំនុកបម្រុងការសិក្សារដល់លោក។ លោក Wang តស៊ូ និងខិតខំរៀនរហូតទទួលបានបរិញ្ញាបត្រពីសកលវិទ្យាល័យបច្ចេកវិទ្យា និងអនុបណ្ឌិតពីវិទ្យាស្ថាន Beijing Non-Ferrous Metal General។
នៅឆ្នាំ ១៩៩៣ លោកទទួលបានតំណែងជាអ្នកគ្រប់គ្រងទូទៅក្នុងក្រុមហ៊ុន Bige Battery។ ចំណែកនៅឆ្នាំ ១៩៩៥ លោកបានបង្កើត BYD ឡើងជាក្រុមហ៊ុនផលិតថ្មទូរស័ព្ទជាមួយនឹងដើមទុន ៣០ មុឺនដុល្លារដែលបានខ្ចីពីបងប្អូនជីដូនមួយ។
ទើបនៅអំឡុងឆ្នាំ ២០០០ ក៏ចាប់ផ្តើមគម្រោងផលិតរថយន្តហៅថា BYD Auto។ រថយន្តដែលបានផលិតមុនគេនោះគឺ BYD F3 ចេញលក់ជាផ្លូវការនៅឆ្នាំ ២០០៥។
នៅឆ្នាំ ២០០៨ វិញ កំពូលអ្នកវិនិយោគជនជាតិអាមេរិកលោក Warren Buffet បានចំណាយប្រាក់ ២៣០ លានដុល្លារ ក្នុងការទិញយកភាគហ៊ុនក្រុមហ៊ុន BYD។ នេះជាការវិនិយោគធំមួយរបស់លោកជាលើកដំបូងក្នុងប្រទេសចិន។ ការទិញនិងលក់ភាគហ៊ុននេះ ជាពេលវេលាមាសប្រាក់មួយរបស់ BYD និងលោក Wang Chuanfu ពីព្រោះបានធ្វើឲ្យកេរ្តិ៍ឈ្មោះក្រុមហ៊ុនល្បីសុសសាយ លើឆាកជំនួញអន្តរជាតិ។
នៅឆ្នាំ ២០២៤ BYD បានក្លាយជាកំពូលក្រុមហ៊ុនផលិតរថយន្តអគ្គិសនី (EV) ដែលមានការលក់ និងចែកចាយរថយន្តចំនួន ៤ លានជាងគ្រឿង កើនឡើងដល់ទៅ ៤១.៣% បើប្រៀបធៀបជាមួយនឹងឆ្នាំមុន។ រួមទាំងជាប់ចំណាត់ថ្នាក់លេខ ១ ជាក្រុមហ៊ុនរកចំណូលបានច្រើនជាងគេនៅត្រីមាសទី ១ នៃឆ្នាំ ២០២៥ ទៀតផង។ ស្របពេលដែលតម្លៃរបស់ក្រុមហ៊ុន BYD ឡើងដល់ទៅ ១៣៩ ពាន់លានដុល្លារ ជាក្រុមហ៊ុនផលិតរថយន្តអគ្គិសនីធំមួយប្រចាំពិភពលោក។
នេះបង្ហាញឲ្យឃើញថា ស្ថាបនិក BYD រូបនេះបានផ្លាស់ប្តូរជោគវាសនាលោកដោយខ្លួនឯងផ្ទាល់ ជាមួយនឹងចំណេះដឹង សមត្ថភាព ការខិតខំប្រឹងប្រែង ភាពច្នៃប្រឌិតរបស់លោកក្នុងការបង្កើតក្រុមហ៊ុន BYD នេះឡើងមក។ ក្នុងនាមជាអ្នកដឹកនាំ និងសហគ្រិនមួយរូប លោកតែងតែព្យាយាមបង្កើតអ្វីថ្មី ឲ្យដូចពាក្យស្លោកដែលលោកតែងតែលើកឡើងនោះគឺ និយាយតិច តែធ្វើច្រើន។