ក្នុងនោះ បន្ទាប់ពីក្លាយជាមនុស្សដំបូងគេនៅលើពិភពលោកដែលមានទ្រព្យសម្បត្តិសរុបដល់ 500ពាន់លានដុល្លារ ពេលនេះ ក្រុមហ៊ុន SpaceX ដែលជាក្រុមហ៊ុនអវកាសរបស់លោក Elon Musk ក៏បានប្រកាសបង្ហាញចេញនូវសេវាកម្មដឹកជញ្ជូនថ្មីរបស់ខ្លួនផងដែរ ដោយក្នុងនោះ សេវាកម្មនេះ គឺផ្តោតសំខាន់ទៅលើការដឹកជញ្ជូនទំនិញទៅកាន់ឋានព្រះច័ន្ទ និងភពព្រះអង្គារ។
បើនិយាយពីសេវាកម្មដឹកជញ្ជូនថ្មីរបស់ក្រុមហ៊ុន SpaceX របស់លោក Elon Musk នេះ នឹងចាប់ផ្តើមបេសកកម្មដឹកទំនិញរបស់ខ្លួនទៅកាន់ឋានព្រះច័ន្ទនៅក្នុងឆ្នាំ ២០២៨ ខាងមុខនេះហើយ ហើយចំណែកបេសកកម្មដឹកជញ្ជូនទៅកាន់ភពព្រះអង្គារវិញ ក៏នឹងចាប់ផ្តើមនៅឆ្នាំ ២០២៩ ឬ ២០៣០ ផងដែរ ហើយវាគឺប្រើប្រាស់នូវយានអវកាស Starship ដែលជាយានអវកាសថ្មីដែលមានទាំងសមត្ថភាពអាចដឹកទំនិញបានច្រើន ហើយអាចប្រើប្រាស់ឡើងវិញបាន ខណៈតម្លៃវិញ គឺមានតម្លៃតែ ១០០លានដុល្លារប៉ុណ្ណោះ នៅក្នុង ១តោន ពោលគឺប្រមាណ ១០មុឺនដុល្លារ ក្នុង ១គីឡូក្រាម។
គួរបញ្ជាក់ថា ក្រៅពីជាមុខជំនួញថ្មី សេវាកម្មដឹកជញ្ជូននេះ ក៏ជាផ្នែកមួយនៃគម្រោងក្នុងការបង្កើតមូលដ្ឋាននៅលើឋានព្រះច័ន្ទនាពេលអនាគតរបស់សហរដ្ឋអាមេរិកផងដែរ៕