ម៉ាកយីហោស៊ុបចិនមួយនេះ ជាប់ឈ្មោះជាហាងដែលមានសេវាកម្មល្អ និងបរិយាកាសល្អបំផុតមួយ។ Haidilao គឺជាហាងហតផតដ៏ល្បីមួយរបស់ប្រទេសចិន ត្រូវបានដំណើរការក្នុងឆ្នាំ ១៩៩៤ ដោយលោក Zhang Yong។
លោកជាអតីតបុគ្គលិករោងចក្រផលិតត្រាក់ទ័រមួយកន្លែង ប៉ុន្តែមានកូនចិត្តមួយចង់បង្កើតអាជីវកម្មផ្ទាល់ខ្លួន ក៏បានចូលហ៊ុនគ្នាជាមួយមិត្តភក្តិមកបើកហាងហតផតមួយឡើង ទាំងមិនធ្លាប់មានបទពិសោធន៍ទៅលើមុខរបរមួយនេះទាល់តែសោះ។ លោក Zhang Yong ជាចុងភៅប្រចាំហាង ដោយបានរៀនធ្វើទឹកស៊ុបពីសៀវភៅរូបមន្តដែលលោកបានទិញ។ Haidilao ចាប់ផ្តើមបង្កើតដំបូងនៅខេត្ត Sichuan ជាមួយនឹងតង់មួយ ដែលដាក់បានតែ ៤ តុប៉ុណ្ណោះ។
ហាងស៊ុបនេះ គឺមិនខុសពីហាងផ្សេងៗនោះទេ មិនមានចំណុចទាក់ទាញ ដែលធ្វើឲ្យចំនួនលក់មានការធ្លាក់ចុះ។ លោក Zhang Yong និងមិត្តភក្តិបានស្វែងរកវិធីសាស្រ្តជាច្រើន ដើម្បីទាក់ទាញអតិថិជនចូលកន្លែងរបស់ពួកគេវិញ។ ដោយបានបញ្ចូលនូវការសំដែងសៀក សេវាកម្មធ្វើក្រចក នំចំណីគ្រប់ប្រភេទសម្រាប់ទុកជូនភ្ញៀវពេលកំពុងរង់ចាំជាដើម។ សូម្បីតែសព្វថ្ងៃ ក៏នៅមានសេវាកម្មទាំងអស់នេះ ថែមទាំងល្អជាងមុនទៀត។
ជាវិធីសាស្រ្តមួយដែលជួយឲ្យដំណើរការហាងបានល្អមានអតិថិជនជាហូរហែរ ក៏ព្រោះតែចំណុចប្លែកៗរបស់ពួកគេក្នុងការធ្វើអាជីវកម្ម។ នៅដើមឆ្នាំ ២០១០ Haidilao ចាប់ផ្តើមល្បីល្បាញនៅក្នុងប្រទេសចិន អាចពង្រីកហាងបានដល់ទៅជាង ១០០ កន្លែង។ ចំណែកក្នុងឆ្នាំ ២០១១ ជាប់ជាម៉ាកយីហោល្បីឈ្មោះបំផុតប្រចាំប្រទេស។
បើក្រឡេកមកមើលការគ្រប់គ្រងអាជីវកម្មវិញ លោក Zhang Yong ជាស្ថាបនិកគឺផ្តោតទៅលើសេវាកម្ម អនាម័យ និងរសជាតិជាចម្បង។ ក្រុមហ៊ុនសង្កត់ធ្ងន់ទៅលើការផ្តល់ជូន បរិយាកាសសប្បាយរីករាយ ជាមួយនឹងសេវាកម្មល្អបំផុត ធ្វើឲ្យភ្ញៀវទទួលបានអារម្មណ៍ល្អ និងចង់ទៅម្តងទៀត។ ជាពិសេសនោះ គឺផ្តល់ឱកាសឲ្យបុគ្គលិកហ៊ានបញ្ចេញមតិក្នុងការសម្រេចចិត្ត ដើម្បីផ្តល់ជូនបទពិសោធន៍ល្អដល់អតិថិជន។
បច្ចុប្បន្ន Haidilao មិនមែនល្បីតែនៅប្រទេសចិននោះទេ ប៉ុន្តែក៏មានវត្តមាននៅក្នុង ១៥ ប្រទេស ជាមួយនឹងហាង ១៥០០ កន្លែងកំពុងដំណើរការ។ មេរៀនដែលទទួលបាន Haidilao គឺការធ្វើអាជីវកម្ម ត្រូវតែស្វែងរកអ្វីខុសគេ មកធ្វើជាចំណុចពិសេស និងចំណុចខ្លាំងរបស់ខ្លួន ទើបអាចធ្វើឲ្យយើងលេចធ្លោ និងជួយឲ្យមុខរបរយើងកាន់តែប្រសើរ។