ស្របពេលដែលមជ្ឈមណ្ឌលទិន្នន័យកំពុងតែក្លាយជាភាពចាំបាច់បំផុតក្នុងវិស័យបច្ចេកវិទ្យា AI របស់ពិភពលោក វាមិនមែនជារឿងចម្លែកទេដែលថានៅក្នុងពេលបច្ចុប្បន្ននេះ AI គឺមានសមត្ថភាពកាន់តែខ្ពស់ឡើងៗ ជាក់ស្តែង នៅក្នុងពេលខាងមុខនេះមជ្ឈមណ្ឌលទិន្នន័យខ្នាតជីហ្គាវ៉ាត់ដែលដំណើរការដោយថាមពលពន្លឺព្រះអាទិត្យនៅក្នុងលំហគឺអាចនឹងលេចរូបរាងឡើងជាផ្លូវការហើយ ហើយវាក៏នឹងក្លាយជាការឆ្នៃប្រឌិតថ្មីដើម្បីឆ្លើយតបទៅនឹងតម្រូវការរបស់ពិភពលោក និងដើម្បីកាត់បន្ថយការប្រើប្រាស់ថាមពលនិងទឹក ដែលកំពុងតែជាបញ្ហាដ៏ធំបំផុតសម្រាប់មជ្ឈមណ្ឌលទិន្នន័យនៅលើដីបច្ចុប្បន្នផងដែរ។
ក្នុងនោះ បើយោងតាមសេចក្តីថ្លែងការណ៍របស់់ស្ថាបនិកក្រុមហ៊ុន Amazon គឺលោក Jeff Bezos នៅក្នុងកម្មវិធី Italian Tech Week នៅក្នុងទីក្រុង Turin បាននិយាយថា នៅក្នុងរយៈពេល 10 ទៅ 20 ឆ្នាំខាងមុខនេះ មជ្ឈមណ្ឌលទិន្នន័យ AI ខ្នាតជីហ្គាវ៉ាត់ នឹងត្រូវបានសាងសង់ឡើងនៅក្នុងលំហហើយ ដោយក្នុងនោះ មជ្ឈមណ្ឌលទិន្នន័យទាំងនេះនឹងដំណើរការដោយថាមពលពន្លឺព្រះអាទិត្យនៅលើលំហដោយខ្លួនឯង ពោលគឺគ្មានពពក ភ្លៀង ឬអាកាសធាតុរំខានដូចមជ្ឈមណ្ឌលទិន្នន័យនៅលើដីនោះឡើយ ហើយវាក៏ក្លាយជាមធ្យោបាយថ្មីរបស់ពិភពលោកដើម្បីជួយកាត់បន្ថយការប្រើប្រាស់ថាមពល និងទឹកនៅលើផែនដីក្នុងពេលបច្ចុប្បន្ននេះផងដែរ។
មួយវិញទៀត លោក Jeff Bezos ផ្ទាល់ ក៏បង្ហាញនូវចក្ខុវិស័យថា AI នឹងជំនួសនូវកិច្ចការជាច្រើនដែលមនុស្សកំពុងតែធ្វើនាពេលបច្ចុប្បន្ននេះនៅក្នុងគ្រប់វិស័យនាពេលអនាគតផងដែរ ពោលគឺវានឹងមានឥទ្ធិពលដូចប្រព័ន្ធអ៊ីនធឺណិតកាលពី ២៥ឆ្នាំមុនអញ្ចឹង៕