នៅឆ្នាំ ២០២៥ នេះ តាមការចុះផ្សាយរបស់ The World Street Journal ម៉ាកយីហោ Mixue Bingcheng កំពុងទទួលបានចំណាត់ថ្នាក់លេខ ១ ក្លាយជា Fast Food Chain ឬហាងអាហាររហ័សដែលមានទីតាំងច្រើនជាងគេនៅលើពិភពលោក។ ជាមួយនឹងទីតាំងចំនួនជាង ៤៦០០០ កន្លែងនៅក្នុងតំបន់អាសុី តំបន់មជ្ឈឹមបូព៌ា និងអាមេរិកខាងត្បូង។ 
Mixue Bingcheng ឬ Mixue ដែលជាហាងការ៉េម តែគុជ ភេសជ្ជៈដ៏ពេញនិយមមួយ ត្រូវបានបង្កើតឡើងនៅក្នុងឆ្នាំ ១៩៩៧។ ហាងនេះជាក្តីសង្ឃឹមថ្មីមួយ បន្ទាប់ពីលោក Zhang Hongchao និង Zhang Hongfu ដែលជាស្ថាបនិកបានបរាជ័យជាច្រើនដងក្នុងអាជីវកម្ម។ ចាប់ផ្តើមជាមួយដើមទុន ៣០០០ យ័ន ប្រហែល ៤៦០ដុល្លារ បង្កើតបានតូបតូចមួយលក់តាមដងផ្លូវនៅក្នុងទីក្រុង ZhengZhou ខេត្ត Henan ប្រទេសចិន។
Mixue ចាប់ផ្តើមមានសន្ទុះខ្លាំង នៅពេលចេញលក់នូវការ៉េមដែលមានតម្លៃត្រឹមតែ ២ យ័នក្នុងមួយដើម។ ដោយក្នុងមួយថ្ងៃអាចលក់បានដល់ទៅ ៥០០០ ដើម ក្លាយជាការ៉េមប្រចាំហាងមកដល់សព្វថ្ងៃ។ ការជោគជ័យមួយនេះប្រៀបដូចជាផ្លាស់ប្តូរ ហាង Mixue ឲ្យក្លាយជាម៉ាកយីហោមួយដែលមានសឹងតែគ្រប់ទីកន្លែងទូទាំងប្រទេសចិន រួមទាំងអាចចាប់ផ្តើមលក់ជា franchise នាំចេញទៅបណ្តាប្រទេសជាច្រើនទៀត។
ក្រៅពីជាហាងការ៉េមហើយនោះ ពួកគេក៏មានខ្សែសង្វាក់ផលិត ឬរោងចក្រផលិតវត្ថុធាតុដើម គ្រឿងផ្សំផ្ទាល់ខ្លួនសម្រាប់ផ្គត់ផ្គង់ទៅកាន់ហាងនីមួយៗ រួមទាំងដឹងថាមានចំការដំណាំផ្ទាល់ខ្លួនទៀតផង។
ភាពជោគជ័យរបស់ Mixue បានមកពីយុទ្ធសាស្រ្តចំគោលដៅមួយគឺតម្លៃទាប បរិមាណច្រើន ពោលអតិថិជនចំណាយតិចទទួលបានច្រើនជាមួយរសជាតិឈ្ងុយឆ្ងាញ់ តម្លៃសមរម្យ ជាយុទ្ធសាស្ត្រឈ្នះៗមួយរបស់ Mixue។ ទើបធ្វើឲ្យពួកគេអាចជោគជ័យ និងពង្រីកបានដល់ទៅជាង ៤៦០០០ កន្លែង មិនថានៅតាមទីក្រុងធំៗ ឬជាយក្រុង តំបន់ឆ្ងាយនោះទេ។ ក្លាយជាម៉ាកយីហោដែលមានកេរ្តិ៍ឈ្មោះ និងពេញនិយមជាងគេមួយនៅលើសកលលោក។