ផលិតផលខ្មែរច្រើនសម្បូរបែបកំពុងចរាចរពេញទីផ្សារ។ សព្វថ្ងៃនេះ ម្ចាស់អាជីវកម្មនីមួយៗ រិះរកនូវគំនិតកែច្នៃ ភាពច្នៃប្រឌិតថ្មីៗ ដើម្បីកែច្នៃវត្ថុធាតុដើមដែលជា កសិផលក្នុងស្រុកមកបង្កើតជាផលិតផលប្រើប្រាស់ចាំបាច់ ដែលមានគុណភាពល្អត្រឹមត្រូវ។
ជាក់ស្តែង សហគ្រាស Apsor (អប្សរ) បានប្រើប្រាស់ផ្លែល្ពៅ មកផលិតចេញជាសាប៊ូដុសខ្លួន។ មិនត្រឹមតែល្ពៅទេ ក៏នៅមានសាប៊ូស្ពៃក្តោប សាប៊ូមង្ឃុត សាប៊ូកាហ្វេ។ ធ្លាប់តែជាម្ហូបអាហារបរិភោគ តែក៏អាចផលិតចេញជាសាប៊ូបានផងដែរ។ ជាផលិតផលថ្មី ផលិតចេញពីកសិផលស្រស់ៗ ក្លិនក្រអូបហើយ ផ្ទុកនូវសារធាតុល្អៗជាច្រើន មានទាំងវីតាមីនជំនួយដល់សុខភាពស្បែក។
ទីពីរ ក្រុមហ៊ុន LSV Industry ដូចបានឃើញកន្លងមក ផលិតផលរបស់ក្រុមហ៊ុនខ្មែរមួយនេះ ភាគច្រើនប្រើប្រាស់វត្ថុធាតុដើមពីកសិផលក្នុងស្រុកមកផលិត។ ដោយបានជ្រើសរើសនូវស្ពៃក្រញាញ់ មកកែច្នៃផលិតចេញជាសាប៊ូលាងមុខ ដុសខ្លួន កក់សក់ រួមទាំងបានច្នៃស្លឹកគ្រៃ និងម្នាស់ទៅជាសាប៊ូលាងចានផងដែរ។
ចុងក្រោយគេ ឯក ប៊ីយូធី – Ek Beauty ជាម៉ាកយីហោគ្រឿងសម្អាងកូនខ្មែរ ដែលបានប្រើប្រាស់នូវវត្ថុធាតុដើមធម្មជាតិជាច្រើនដូចជាដូង ស្តៅមកផលិតចេញជាសាប៊ូ និងប្រេងជាដើម។ រួមទាំងច្នៃក្រូចសើច ល្ងខ្មៅផលិតចេញជាស្រ្កាប់ទៀតផង។ ក្រៅពីនេះ ក៏នៅតែមានផលិតផលជាច្រើនផ្សេងទៀត ដែលសុទ្ធសឹងតែផលិតក្នុងស្រុក និងប្រើប្រាស់វត្ថុធាតុដើមក្នុងស្រុក។
ជារឿងមួយគួរតែសរសើរ ដែលសិប្បកម្មខ្មែរយើង មានសមត្ថភាពក្នុងការយកបន្លែផ្លែឈើ ប្រើប្រាស់ជាវត្ថុធាតុដើម បង្កើតនូវរូបមន្តត្រឹមត្រូវមួយ ដើម្បីផលិតនូវផលិតផលធម្មជាតិ មានទាំងគុណភាព និងអត្ថប្រយោជន៍ជាច្រើន។ ដូច្នេះ ចូលរួមគាំទ្រទាំងអស់គ្នា ដើម្បីលើកស្ទួយផលិតផលក្នុងស្រុក និងរួមជាចំណែកមួយជួយដល់សេដ្ឋកិច្ចជាតិ។