ដើម្បីធ្វើការឆ្លើយតបទៅនឹងតម្រូវការនៃការកើនឡើងយ៉ាងគំហុកក្នុងផ្នែកបច្ចេកវិទ្យា AI នាពេលបច្ចុប្បន្ននេះ ក្រុមហ៊ុន Meta ដែលក្រុមហ៊ុនធំរបស់ Facebook ក៏ដូចជាក្រុមហ៊ុនរបស់លោក Mark Zuckerberg គឺបានប្រកាសបង្ហាញចេញនូវផែនការសាងសង់មជ្ឈមណ្ឌលទិន្នន័យថ្មីមួយទៀតហើយ ដោយក្នុងនោះ មជ្ឈមណ្ឌលទិន្នន័យថ្មីនេះគឺមានទំហំដល់ទៅ 5 ជីហ្គាវ៉ាត់ (gigawatts) ឯណ្ណោះ និងមានទីតាំងស្ថិតនៅក្នុងរដ្ឋ Louisiana ។
ក្នុងនោះ ការសាងសង់មជ្ឈមណ្ឌលទិន្នន័យថ្មីរបស់ក្រុមហ៊ុន Meta នេះ គឺជាការវិនិយោគដ៏ធំបំផុរបស់ក្រុមហ៊ុន ហើយវាគឺមានឈ្មោះថា Hyperion និងគ្រោងប្រកាសបើកដំណើរការជាផ្លូវការក្នុងដំណាក់កាលដំបូង (1.5GW) ក្នុងឆ្នាំ 2026 ខាងមុខនេះ។
ក្រៅពីគម្រោង Hyperion នៅក្នុងរដ្ឋ Louisiana នេះ, ក្រុមហ៊ុន Meta ផ្ទាល់ក៏កំពុងសាងសង់នូវមជ្ឈមណ្ឌលទិន្នន័យថែមមួយទៀតផងដែរ ដោយមានឈ្មោះថា Prometheus, ទំហំ 1GW និងមានទីតាំងស្ថិតនៅក្នុងរដ្ឋ Ohio ។ ជាមួយគ្នានេះ លោក Mark Zuckerberg ផ្ទាល់ ក៏គ្រោងនឹងបន្ថែមនូវការវិនិយោគរាប់រយពាន់លានដុល្លារបន្ថែមទៀតនៅក្នុងពេលឆាប់ៗនេះផងដែរ។
គួរបញ្ជាក់ថា សម្រាប់មជ្ឈមណ្ឌលទិន្នន័យថ្មីទាំង ២ នេះ នឹងប្រើប្រាស់ក្នុងលក្ខខណ្ឌ ២ បែប ដែលមួយក្នុងនោះគឺសម្រាប់បម្រើការជាសម្បត្តិរបស់ក្រុមហ៊ុន Meta ផ្ទាល់ ហើយមួយទៀតគឺសម្រាប់បម្រើការជាសេវាកម្មជួល។ លើសពីនេះ មជ្ឈមណ្ឌលទាំង ២ នេះ ក៏នឹងប្រើប្រាស់នូវប្រព័ន្ធថាមពលចម្រុះដូចជាថាមពលកកើតឡើងវិញ និងឧស្ម័នធម្មជាតិផងដែរ៕