បើយោងតាមការរាយការណ៍នាពេលថ្មីៗនេះបានឲដឹងថា ក្រុមហ៊ុន Apple ទំនងជាមិនអាចបន្តការលក់នូវ iPhone របស់ខ្លួនដែលប្រើប្រាស់នូវអេក្រង់ដែលផលិតដោយក្រុមហ៊ុន BOE របស់ចិននៅសហរដ្ឋអាមេរិកបានទៀតនោះឡើយ បន្ទាប់ពីគណៈកម្មការពាណិជ្ជកម្មអន្តរជាតិអាមេរិក (ITC) បានចេញសេចក្តីសម្រេចបឋមក្នុងការហាមឃាត់ទៅលើក្រុមហ៊៊ុនមួយនេះ។
ក្នុងនោះ ករណីមួយនេះគឺកើតឡើងដោយសារតែបញ្ហាច្បាប់ពាណិជ្ជកម្មរវាងក្រុមហ៊ុន Samsung Display និងក្រុមហ៊ុន BOE ។ ជាក់ស្តែង ក្រុមហ៊ុន Samsung Display គឺបានចោទក្រុមហ៊ុន BOE ថាបានរំលោភសិទ្ធទៅលើការប្រើប្រាស់នូវបច្ចេកវិទ្យា OLED ដែលជាកម្មសិទ្ធិរបស់ពួកគេ។
ជាមួយគ្នានេះ បើយោងតាមការសម្រេចរបស់ ITC ទៅលើក្រុមហ៊ុន Apple គឺមានចំនួន ២បែប ដែលមួយក្នុងនោះគឺក្រុមហ៊ុន Apple ត្រូវតែបញ្ឈប់នូវការនាំចូល iPhone ដែលប្រើអេក្រង់របស់ BOE ទាំងអស់ទៅសហរដ្ឋអាមេរិក ហើយមួយទៀតក៏មិនអាចលក់ ឬប្រើប្រាស់ស្តុកដែលនៅសល់បានផងដែរ។
គួរបញ្ជាក់ថា បើទោះបីជាសេចក្តីសម្រេចនេះមិនទាន់មានការឯកភាពជាផ្លូវការនៅឡើយក៏ដោយ ក៏ប៉ុន្តែអាចនឹងប្រកាសចេញនូវសេចក្តីសម្រេចចុងក្រោយពីសំណាក់រដ្ឋាភិបាលនៅក្នុងខែវិច្ឆិកាខាងមុខនេះហើយ។
ក្នុងនោះ ប្រសិនបើការសម្រេចនេះត្រូវបានអនុវត្តន៍បានដោយជោគជ័យនោះ វានឹងបង្កនូវផលប៉ះពាល់យ៉ាងខ្លាំងដល់ក្រុមហ៊ុន Apple ហើយក៏អាចនឹងមាននូវផលប៉ះពាល់ដល់ការផ្គត់ផ្គង់សម្រាប់ iPhone ជាច្រើនម៉ូឌែលផងដែរ៕