យោងតាម Bloomberg គឺបានរាយការណ៍ឲដឹងថា នៅក្នុងពេលនេះ សហរដ្ឋអាមេរិក គឺបានរៀបចំការត្រួតពិនិត្យទៅលើការនាំចេញបន្ទះឈីប AI កម្រិតខ្ពស់ទៅកាន់ប្រទេសជាច្រើននៅក្នុងតំបន់អាស៊ីអាគ្នេយ៍ដូចជាប្រទេសម៉ាឡេស៊ី និងប្រទេសថៃហើយ ដើម្បីរារាំងនូវការចូលប្រើប្រាស់ដោយប្រយោលរបស់ប្រទេសចិនទៅកាន់បន្ទះឈីប AI ទាំងនេះ។
ក្នុងវិធានការថ្មីទាំងនេះ សហរដ្ឋអាមេរិក គឺទាមទារឲ្យក្រុមហ៊ុនដែលនាំចេញនូវបន្ទះឈីប AI កម្រិតខ្ពស់ៗដូចជា H100 របស់ក្រុមហ៊ុន Nvidia ទៅប្រទេសដូចជាប្រទេសម៉ាឡេស៊ី និងប្រទេសថៃ គឺត្រូវតែមាន ឬទទួលបាននូវអាជ្ញាប័ណ្ណជាមុនសិន ខណៈការសម្រេចចិត្តនេះគឺត្រូវបានអនុវត្តបន្ទាប់ពីមានសញ្ញាសង្ស័យថាប្រទេសចិនបានប្រើប្រាស់ប្រទេសនៅក្នុងតំបន់អាស៊ីអាគ្នេយ៍ទាំងនេះជាច្រកចម្លងដើម្បីទទួលបានបន្ទះឈីប AI ដោយជៀសវាងច្បាប់ហាមឃាត់ដែលអាមេរិកបានដាក់លើប្រទេសខ្លួន។ ជាក់ស្តែងគឺមានការរាយការណ៍ថា វិស្វករចិនគឺបានផ្ញើទិន្នន័យទៅកាន់ប្រទេសម៉ាឡេស៊ីសម្រាប់បណ្តុះបណ្តាលនូវបច្ចេកវិទ្យា AI របស់ខ្លួន បន្ទាប់ពីសិង្ហបុរីបានចាប់ផ្តើមរឹតបន្តឹងទៅលើការនាំចេញនូវឧបករណ៍បច្ចេកវិទ្យាទាំងនេះ។
គួរបញ្ជាក់ថា បើទោះបីជាមានការសហការគ្នារវាងផ្នែកសេដ្ឋកិច្ចខ្លះៗជាមួយចិនក៏ដោយ ក៏អាមេរិកនៅតែបង្ហាញពីការប្តេជ្ញាចិត្តក្នុងការការពារដល់ការចូលប្រើប្រាស់នូវបច្ចេកវិទ្យាទាំងនេះផងដែរសម្រាប់ប្រទេសចិនផងដែរ៕