រដ្ឋាភិបាលអង់គ្លេសបាននិយាយថា អ្នកធ្វើដំណើរមកពីប្រទេសហ្វីលីពីន ប៉ាគីស្ថាន កេនយ៉ា និងបង់ក្លាដែស នឹងត្រូវហាមឃាត់នៅសប្តាហ៍ក្រោយ។
ពួកគេកំពុងត្រូវបានបញ្ចូលទៅក្នុងបញ្ជីក្រហមរបស់អង់គ្លេស ចំពេលមានក្តីបារម្ភអំពីការរីករាលដាលនៃជំងឺកូវីដ១៩ ប្រភេទថ្មី។ ចាប់ពីម៉ោង ៤ ព្រឹក ថ្ងៃទី ៩ ខែមេសា ភ្ញៀវអន្តរជាតិដែលបានធ្វើដំណើរមកពី ឬឆ្លងកាត់ប្រទេសទាំងនោះក្នុងរយៈពេល ១០ ថ្ងៃមុន នឹងត្រូវបានបដិសេធមិនឲ្យចូលមកប្រទេសអង់គ្លេសឡើយ។
ទោះជាយ៉ាងណាក៏ដោយ ការលើកលែងត្រូវបានធ្វើឡើងសម្រាប់អ្នកកាន់លិខិតឆ្លងដែនអង់គ្លេស ឬអៀរឡង់ ឬអ្នកដែលមានសិទ្ធិរស់នៅចក្រភពអង់គ្លេស។ ប៉ុន្តែជាដំបូងពួកគេត្រូវបង់ប្រាក់ដើម្បីធ្វើចក្តាឡីស័កនៅក្នុងសណ្ឋាគារ ដែលអនុម័តដោយរដ្ឋាភិបាលរយៈពេល ១០ ថ្ងៃ។
គួរឲ្យដឹងថា បច្ចុប្បន្ននេះមានប្រទេសជិត ៤០ ហើយ កំពុងស្ថិតក្នុងបញ្ជីក្រហមរបស់រដ្ឋាភិបាលអង់គ្លេស ដែលជាប្រទេសហាមឃាត់ការធ្វើដំណើរ៕