ក្រុមហ៊ុន Apple នឹងពង្រីកទៅប្រទេសវៀតណាម នូវកម្មវិធីមួយដែលផ្តល់ជូនហាងជួសជុលឯករាជ្យ នូវលទ្ធភាពទទួលបានគ្រឿងបន្លាស់ពិតប្រាកដពីខ្លួន។
នៅក្នុងគេហទំព័រប្លុកផ្លូវការរបស់ខ្លួន ក្រុមហ៊ុន Apple បាននិយាយថា ខ្លួននឹងបើកការចុះឈ្មោះសម្រាប់កម្មវិធីនៅចុងសប្តាហ៍នេះ សម្រាប់ប្រទេសវៀតណាម និងទីផ្សារចំនួន ៣៧ ផ្សេងទៀត រួមមាន អូស្រ្តាលី កូរ៉េខាងត្បូងនិងអារ៉ាប់រួម ផងដែរ។ ចំណែកឯប្រទេសផ្សេងទៀត ដូចជា ប្រទេសចិន នឹងចាប់ផ្តើមនៅចុងឆ្នាំនេះ។
នេះមានន័យថា អតិថិជននឹងមិនចាំបាច់ទៅជួបអ្នកផ្តល់សេវាកម្មដែលមានការអនុញ្ញាតពី Apple ដើម្បីដោះស្រាយបញ្ហាទូរសព្ទ iPhone និង Macbook របស់ពួកគេឡើយ ហើយអាចទៅរកអ្នកជួសជុលភាគីទីបីទាំងនោះបាន។
គួរឲ្យដឹងថា អាជីវកម្មដែលមានចំណាប់អារម្មណ៍អាចចូលរួមក្នុងកម្មវិធីនេះដោយឥតគិតថ្លៃ ប៉ុន្តែត្រូវមានអ្នកបច្ចេកទេសដែលមានវិញ្ញាបនប័ត្រទទួលស្គាល់ពីក្រុមហ៊ុន Apple (វិញ្ញាបនប័ត្រក៏ឥតគិតថ្លៃដែរ) ដើម្បីធ្វើការជួសជុល៕