ក្នុងពេលថ្មីៗនេះ សហរដ្ឋអាមេរិកបានអនុវត្តវិធានការលើកកម្ពស់ពន្ធនាំចូលលើទំនិញ និងផលិតផលអេឡិចត្រូនិកដែលនាំចូលពីប្រទេសមួយចំនួនដូចជា ចិន វៀតណាម និងឥណ្ឌា។ វិធានការនេះ ត្រូវបានគេរំពឹងថានឹងបង្កផលប៉ះពាល់យ៉ាងខ្លាំងលើឧស្សាហកម្មផលិតស្មាតហ្វូន និងឧបករណ៍បច្ចេកវិទ្យាផ្សេងៗ។ ជាពិសេស ក្រុមហ៊ុនអន្តរជាតិធំៗដូចជា Apple និង Samsung ដែលកំពុងតែមានការពឹងផ្អែកយ៉ាងខ្លាំងលើប្រទេសចិន និងវៀតណាមសម្រាប់អាជីវកម្មផលិតកម្មរបស់ខ្លួន។
- ក្រោមវិធានការថ្មីនេះ ការនាំចូលផលិតផលពីប្រទេសចិននឹងត្រូវបង់ពន្ធដល់ទៅ ៣៤% ខណៈវៀតណាមនឹងប្រឈមនឹងអត្រាពន្ធខ្ពស់ជាងគឺ ៤៦%។ ប្រសិនបើវិធានការនេះត្រូវបានអនុវត្តជារឿយៗ នឹងធ្វើឲ្យតម្លៃស្មាតហ្វូន កុំព្យូទ័រ និងឧបករណ៍អេឡិចត្រូនិកផ្សេងៗឡើងថ្លៃយ៉ាងច្រើន។ បើយោងតាមការវិភាគ បានឲដឹងថា តម្លៃស្មាតហ្វូន iPhone របស់ Apple អាចនឹងឡើងថ្លៃដល់ទៅ ២,៣០០ ដុល្លារ ឯណ្ណោះ។ ទោះយ៉ាងណាក៏ដោយ ក្រុមហ៊ុនក៏កំពុងព្យាយាមកាត់បន្ថយការចំណាយខ្លះៗ ដើម្បីជួយកាត់បន្ថយផលប៉ះពាល់ទៅលើអតិថិជនផងដែរ ប៉ុន្តែវាក៏អាចនឹងបង្កសម្ពាធដល់ប្រាក់ចំណេញរបស់ក្រុមហ៊ុនផងដែរ។
ក្នុងនោះ ក្រុមហ៊ុន Apple ត្រូវបានរាយការណ៍ថា កំពុងពិចារណាការផ្លាស់ប្តូរផលិតកម្មទៅកាន់ប្រទេសឥណ្ឌា តាមរយៈភាពជាដៃគូជាមួយក្រុមហ៊ុន Foxconn ដើម្បីកាត់បន្ថយការពឹងផ្អែកលើប្រទេសចិន។ ទោះជាយ៉ាងណាក៏ដោយ ក៏នឹងធ្វើឲ Apple ត្រូវបង់ពន្ធនាំចូល ២៦% ផងដែរ នៅក្នុងប្រទេសឥណ្ឌា។ ចំណែកក្រុមហ៊ុន Samsung វិញ អាចប្តូរផលិតកម្មរបស់ខ្លួនត្រលប់ទៅកូរ៉េខាងត្បូងវិញ ដើម្បីប្រឈមនឹងពន្ធតិចជាងមុន គឺត្រឹមតែ ២៥ ភាគរយ ប៉ុណ្ណោះ។
គួរបញ្ជាក់ថា ការកើនឡើងនៃពន្ធនាំចូលនេះត្រូវបានរំពឹងថា នឹងមានភាពប៉ះពាល់យ៉ាងខ្លាំងដល់ឧស្សាហកម្មអេឡិចត្រូនិក និងបង្កឱ្យមានការប្រែប្រួលលើខ្សែសង្វាក់ផ្គត់ផ្គង់របស់ក្រុមហ៊ុន ទីផ្សាររបស់ក្រុមហ៊ុន និងចំណូលរបស់ក្រុមហ៊ុន។ ជាពិសេសគឺសម្រាប់អ្នកប្រើប្រាស់ទំនងជានឹងជួបប្រទះនឹងការកើនឡើងនៃតម្លៃផលិតផលបច្ចេកវិទ្យា ដែលអាចធ្វើឲ្យការទិញរបស់ពួកគេមានការស្ទាក់ស្ទើរនៅពេលអនាគត៕