កាលពីពេលថ្មីៗនេះ ក្រុមហ៊ុន OnePlus បានប្រកាសជាផ្លូវការថា ពួកគេនឹងបង្ហាញចេញនូវស្មាតហ្វូនថ្មីមួយនៅចុងខែនេះ ដែលមានឈ្មោះថា OnePlus 13T ។ វាជាស្មាតហ្វូនកម្រិតថវិការ ដែលត្រូវបានរចនាឡើងសម្រាប់ផ្តល់បទពិសោធន៍ប្រើប្រាស់ល្អ ប៉ុន្តែមានសមត្ថភាពខ្ពស់ដូចជាស្មាតហ្វូនតម្លៃថ្លៃអញ្ជឹង។
តាមការប្រកាសរបស់ប្រធានក្រុមហ៊ុន OnePlus ប្រចាំប្រទេសចិន លោក Li Jie បានបង្ហាញថា OnePlus 13T នឹងមាន ថាមពលថ្មខ្ពស់ជាង 6,000mAh និងគាំទ្រការសាកថ្មល្បឿនលឿនកម្លាំង 80W ។ ក្នុងនោះ ស្មាតហ្វូនមួយនេះ នឹងដំណើរការដោយឈីប Snapdragon 8 Elite ដែលជាប្រភេទឈីបកម្រិតខ្ពស់ សមស្របសម្រាប់ការរត់កម្មវិធីធ្ងន់ៗ និងលេងហ្គេម។ លើសពីនេះ វាក៏នឹងទទួលបាននូវឈីបមួយផ្សេងទៀត សម្រាប់ការដំណើរហ្គេមផងដែរ ដែលអាចកែប្រែប្រេកង់ CPU និង GPU ដោយស្វ័យប្រវត្តិ ដើម្បីធានាថាការលេងហ្គេមមានភាពរលូន និងដំណើរការលឿន។
ទៅលើផ្នែកអេក្រង់ OnePlus 13T នឹងទទួលបានអេក្រង់ 6.3 អ៊ីញ កម្រិត 1.5K 120Hz ជាមួយការរចនាគែមស្តើង និងស៊ុមស្រស់ស្អាត។ សម្រាប់ផ្នែកកាមេរ៉ានឹងទទួលបានលេនគោល 50MP និងលេន telephoto ទំហំ 50MP ជាមួយមុខងារ OIS ។
ទៅលើតម្លៃលក់ OnePlus 13T ត្រូវបានរំពឹងថា នឹងមានតម្លៃក្រោម 4,000 យ៉ាន់ ឬប្រហែល $550 ខណៈព៌ត័មានលម្អិតផ្សេងទៀតខាងក្រុមហ៊ុនមិនទាន់បង្ហាញចេញនៅឡើយទេ៕