ក្រុមហ៊ុន Burger Thailand ដែលជាប្រតិបត្តិករនៃហាងអាហារ Burger King មានបំណងជំរុញការលក់នៅឆ្នាំនេះ ឲ្យឈានដល់កម្រិតមុនពេលមានវិបត្តិ ដែលត្រូវបានកត់ត្រាក្នុងឆ្នាំ ២០១៩ ដោយបានប្រឡូកខ្លួនចូលទៅក្នុងទីផ្សារសាច់មាន់បំពង ជាលើកដំបូងបង្អស់។
លោក Tanawat Damnernthong អ្នកគ្រប់គ្រងទូទៅរបស់ក្រុមហ៊ុនខាងលើ បាននិយាយថា តម្រូវការសម្រាប់សាច់មាន់បំពង នៅក្នុងឧស្សាហកម្មភោជនីយដ្ឋានអាហាររហ័ស (fast food) បានកើនឡើងពី ៧-៩% ជារៀងរាល់ឆ្នាំ ដោយមានម៉ាកចំនួន ១០ ចូលទៅក្នុងទីផ្សារនេះ ទោះបីជាមានជំងឺរាតត្បាតក៏ដោយ ដូចជា Choongman និង Gugu Chicken។
Bonchon និង Texas ក៏បានចែកសាខាជាច្រើនកាលពីឆ្នាំមុនដែរ ខណៈភោជនីយដ្ឋានជប៉ុនមួយចំនួនបានផ្តល់ជូនសាច់មាន់បំពង តាមរយៈបណ្តាញចែកចាយរបស់ពួកគេ។ និន្នាការនេះបានរីកចម្រើនជាបណ្តើរៗ ជាមួយនឹងការផ្លាស់ប្តូរឥរិយាបទរបស់អតិថិជន។ ពួកគេជ្រើសរើសអាហារដែលមានល្បឿនលឿន និងសុខភាពល្អ (heathier fast food) ជាពិសេសអាហារដែលមានសាច់មាន់។
សូមបញ្ជាក់ឲ្យដឹងដែរថា សាច់មាន់បំពង ទទួលបានការចូលចិត្តច្រើននៅទូទាំងពិភពលោកកាលពីឆ្នាំមុន មិនមែនត្រឹមតែនៅក្នុងប្រទេសថៃប៉ុណ្ណោះទេ៕