McDonald’s ជាហាងអាហាររហ័ស (Fast Food) ដ៏ល្បីល្បាញលើពិភពលោក មានដើមកំណើតនៅសហរដ្ឋអាមេរិកដោយត្រូវបានបង្កើតឡើងដោយបងប្អូនប្រុសពីររូបគឺ លោក Richard McDonald និងលោក Maurice McDonald នៅឆ្នាំ ១៩៤០។
ទីក្រុង Bernardino រដ្ឋ California គឺជាទីតាំងដំបូងរបស់ Mcdonald’s។ ពីមុន ហាងនេះបានផ្តល់ជូនអាហារដល់ទៅ ២៥ មុខ។ ប៉ុន្តែអាហារដែលលក់ដាច់គឺមានតែប្រភេទប៊ឺហ្គឺ និងប្រភេទភេសជ្ជៈក្រឡុកប៉ុណ្ណោះ។ ទើបធ្វើឲ្យ Richard និង Maurice បានសម្រេចចិត្តកែប្រែមីនុយក្នុងហាងឡើងវិញ ដោយឈប់សម្រាកដល់ទៅ ៣ខែ។
នៅឆ្នាំ ១៩៤៨ McDonald’s ក៏បានត្រឡប់មកវិញជាមួយនឹងអាហារតែ ៩ មុខប៉ុណ្ណោះ រួមជាមួយនឹងខ្សែសង្វាក់ផលិតថ្មី Speedee Service System ដែលបានដាក់ឲ្យអនុវត្ត ដើម្បីសម្រួលដំណើរការនៅក្នុងផ្ទះបាយ និងដំណើរការហាងទាំងមូល។ ដោយបុគ្គលិកម្នាក់ៗមានតួនាទីមុខងាររៀងៗខ្លួន ក្នុងការចំអិន និងការវេចខ្ចប់អាហារទុកជាមុន។ ក្រៅពីនេះពួកគេ បានប្តូរមកប្រើប្រាស់ Self-Service វិញដែលអតិថិជនអាចធ្វើការកុម្មង់ និងមកទទួលអាហារដោយផ្ទាល់។
Speedee Service System បានផ្តល់លទ្ធផលវិជ្ជមានជាច្រើនដល់កេរ្តិ៍ឈ្មោះ McDonald’s។ ជាពិសេស ខ្សែសង្វាក់ថ្មីនេះ បាននាំការចាប់អារម្មណ៍ដល់ Ray Kroc ដែលជាអ្នកផ្គត់ផ្គង់ម៉ាសុីនក្រឡុកដល់ McDonald’s។ នៅឆ្នាំ ១៩៥៤ លោក Ray Kroc បានមើលឃើញពីសក្តានុពលនៃគំរូអាជីវកម្មនេះ ហើយបានចរចាទិញសិទ្ធិផ្តាច់មុខពីបងប្អូន McDonald ដើម្បីពង្រីកសាខាទូទាំងប្រទេស ដោយចាប់ផ្តើមដំបូងនៅភាគខាងកើតនៃទន្លេ Mississippi។
នៅឆ្នាំ ១៩៦១ លោក Ray Kroc បានទិញយកក្រុមហ៊ុន McDonald’s ទាំងស្រុងពី Richard និង Maurice ក្នុងតម្លៃ ២,៧ លានដុល្លារ។ បន្ទាប់ពីទិញយក លោកបានធ្វើការផ្លាស់ប្តូរនិមិត្តសញ្ញា និងរបៀបគ្រប់គ្រងទាំងស្រុង។ ម៉្យាងវិញទៀត លោកបានអនុវត្តយុទ្ធសាស្រ្តថ្មីមួយ ដែលមិនតែប៉ុណ្ណោះ Ray ក៏បានអនុវត្តយុទ្ធសាស្រ្តថ្មីមួយ គឺទីតាំងដែលល្អសម្រាប់បើក McDonald’s គឺលោកនឹងទិញយក រួចជួលទៅឲ្យអ្នកដែលបានទិញសិទ្ធិផ្តាច់មុខ McDonald’s ទៅបើកតាមតំបន់នីមួយៗ។ វិធីសាស្ត្រនេះបានធ្វើឱ្យប្រាក់ចំណូលមានស្ថិរភាព និងងាយស្រួលក្នុងការគ្រប់គ្រងគុណភាពម៉ាកយីហោ។
ទោះបីជា McDonald’s ត្រូវបានបង្កើតឡើងដោយលោក Richard និង Maurice McDonald ប៉ុន្តែពួកគេមិនត្រូវបានគេស្គាល់ច្រើនដូច Ray Kroc ទេព្រោះថា Ray គឺជាអ្នកនាំយក McDonald’s ទៅកាន់ទីផ្សារក្រៅប្រទេស និងជាអ្នកពង្រីកទីផ្សារឥតឈប់ឈរដូចគ្នា។ McDonald’s អាចសន្និដ្ឋានបានថាលើសពីហាង Fast Food ព្រោះពួកគេបានបង្ហាញពីដំណើរការកែច្នៃ និងកែប្រែពីមួយចំណុចទៅមួយចំណុច ក្នុងការផ្តល់ជូនអ្វីថ្មីៗដល់អតិថិជននៅជាង ៤០,០០០ កន្លែង ក្នុង ១០០ ប្រទេស។