Louis Vuitton (LV) គឺជាម៉ាកយីហោប្រណីតលំដាប់ពិភពលោក ដែលមានដើមកំណើតពីប្រទេសបារាំង។ យីហោនេះត្រូវបានបង្កើតឡើងដោយលោក Louis Vuitton ផ្ទាល់នៅឆ្នាំ ១៨៥៤។ មុនពេលមានយីហោផ្ទាល់ខ្លួន លោក Louis Vuitton បានបម្រើការជាសិប្បករជំនាញផ្នែកផលិតកាបូប និងវ៉ាលីអស់រយៈពេលដល់ទៅ ១៧ឆ្នាំ។
នៅឆ្នាំ ១៨៥៨ Louis Vuitton បានបង្កើតប្រអប់ដាក់ឥវ៉ាន់ ឬវ៉ាលីមួយ ដែលមានរាងជាចតុកោណកែង ផលិតឡើងពីបន្ទះឈើស្រោបដោយផ្ទាំងក្រណាត់ដែលធន់នឹងទឹក។ ការរចនារាងសំប៉ែតនេះ គឺមានភាពប្លែក និងប្រើប្រាស់យ៉ាងងាយស្រួលជាងវ៉ាលីរាងមូលក្នុងសម័យនោះ។ ស្របពេលតម្រូវការធ្វើដំណើរកើនឡើង វ៉ាលីដំបូងនេះ ទទួលបានជោគជ័យភ្លាមៗ។
ត្រឹមតែមួយឆ្នាំ អាជីវកម្មលោកមានការរីកចម្រើនយ៉ាងឆាប់រហ័ស ដោយលោក Vuitton បានផ្លាស់ប្តូររោងជាង និងទីលំនៅទៅកាន់តំបន់ Asnières ជិតទន្លេ Seine ដោយមានសិប្បករជាង ១០០នាក់ធ្វើការនៅទីនោះ។ នៅឆ្នាំ ១៨៧០ រោងជាងលោកត្រូវបានរឹបអូសឧបករណ៍ជាច្រើនត្រូវបានលួច និងបំផ្លាញចោល បណ្តាលឲ្យមានការខាតបង់យ៉ាងសម្បើម អំឡុងពេលដែលសង្រ្គាមបារាំង-អាល្លឺម៉ង់ផ្ទុះឡើង។
សង្រ្គាមចប់ភ្លាម លោកបានប្រមូលប្រាក់សន្សំមកបង្កើតហាងថ្មីមួយនៅទីក្រុងប៉ារីស ម្តុំតំបន់ប្រវត្តិសាស្រ្ត Opéra Garnier និង Louvre។ ចំណែកលោក ក៏បានចេញនូវវ៉ាលីថ្មីមួយ ដែលភ្ជាប់សោរមកជាមួយ ក្នុងការរក្សាសុវត្ថិភាពជាងមុន។ ភាពល្បីល្បាញរបស់វ៉ាលី Louis Vuitton បានធ្វើឲ្យមានជាការចម្លងទាំងរូបរាង បន្ទះឈើ សូម្បីក្រណាត់ក៏ដូចគ្នាស្ទើរតែទាំងស្រុង។
ដើម្បីដោះស្រាយបញ្ហានេះ លោក Georges Vuitton ដែលជាស្នងមុខរបរ និងជាកូនប្រុសបានផ្តួចផ្តើមគំនិតក្នុងការប្រើប្រាស់ក្រណាត់ស្បែក ដែលមានអក្សរ “LV” បញ្ចូលគ្នាជាលំនាំផ្កាហៅថា “LV Monogram” ធ្វើជានិមិត្តសញ្ញាដ៏រឹងមាំក្នុងការរក្សាកេរ្តិ៍ឈ្មោះ និងគុណភាពនៃម៉ាកយីហោ។ ក្រោមការដឹកនាំលោក LV ចាប់ផ្តើមពង្រីកខ្លួន និងចូលរួមកម្មវិធីជាច្រើន។ ជាក់ស្តែងបានតាំងបង្ហាញម៉ូតវ៉ាលី នៅកម្មវិធី World’s Columbian Exposition ក្នុងទីក្រុង Chicago ដើម្បីនាំយកផលិតផលខ្លួនទៅទីផ្សារអាមេរិក។
ម៉ាកយីហោ Louis Vuitton ត្រូវបានគ្រប់គ្រងបន្តពីមួយជំនាន់ទៅមួយជំនាន់ក្នុងត្រកូលគ្រួសារ។ ប៉ុន្តែនៅទសវត្សរ៍ឆ្នាំ ១៩៨០ យីហោនេះត្រូវបានផ្លាស់ប្តូរក្នុងទិសដៅថ្មី ក្រោមការគ្រប់គ្រងរបស់លោក Henri Racamier។ លោកបានប្រកាសពីការរួមបញ្ចូលគ្នារវាងក្រុមហ៊ុន Louis Vuitton និងក្រុមហ៊ុនផលិតស្រាប្រណីត Moët-Hennessy បង្កើតទៅជា ក្រុមហ៊ុន LVMH ដោយមានលោក Bernard Arnault ជានាយកប្រតិបត្តិ។ ការរួមបញ្ចូលគ្នានេះបានជំរុញឲ្យ Louis Vuitton ក្លាយជាមហាអំណាចប្រណីតមួយនៅទូទាំងពិភពលោក។
បច្ចុប្បន្ន យីហោ Louis Vuitton នៅឈរជើងយ៉ាងរឹងមាំក្នុងនាមជាម៉ាកមួយដែលប្រណិតបំផុតក្នុងរយៈពេលជិត ២សតវត្ស មានជាង ៦០០០ កន្លែងជុំវិញពិភពលោក។ ភាពជោគជ័យដ៏យូរអង្វែងនេះ បានបង្ហាញឲ្យឃើញពីមហិច្ឆតា និងភាពច្បាស់លាស់ក្នុងការធ្វើអាជីវកម្ម ការប្តេជ្ញាចិត្តចំពោះការផ្តល់នូវគុណភាពលំដាប់ខ្ពស់ និងការកសាងទំនុកចិត្តជាមួយអតិថិជន ដែលជាកត្តាសំខាន់បំផុតក្នុងការរក្សាអាជីវកម្មមួយឲ្យដើរបានឆ្ងាយ។