កាលពីថ្ងៃពុធកន្លងទៅនេះ ក្រុមហ៊ុនអាកាសចរណ៍ហុងកុង Cathay Pacific Airways បានបង្ហាញពីការខាតបង់ជាទឹកប្រាក់ចំនួន ២១,៦ ពាន់លានដុល្លារហុងកុង (ស្មើនឹង ២,៨ ពាន់លានដុល្លារអាមេរិក) ក្នុងឆ្នាំ ២០២០ ដែលជាឆ្នាំរងគ្រោះដោយសារជំងឺរាតត្បាតកូវីដ១៩ ហើយវាជាវិបត្តិដ៏អាក្រក់បំផុតនៅក្នុងប្រវត្តិសាស្ត្រអាកាសចរណ៍ពាណិជ្ជកម្ម។
លទ្ធផលហិរញ្ញវត្ថុប្រចាំឆ្នាំរបស់ក្រុមហ៊ុនអាកាសចរណ៍ខាងលើ បានធ្លាក់ចុះទាបជាងការព្យាករណ៍ដូចដែលវាបានបង្ហាញពីការខាតបង់ដ៏ធំបំផុតមួយ ចាប់តាំងពីវិបត្តិសុខភាពសាធារណៈ បានលេចឡើងជាងមួយឆ្នាំកន្លងមក។
ការខាតបង់នៅឆមាសទី ២ នៃឆ្នាំ ២០២០ បានកើនឡើងដល់ ១១,៨ ពាន់លានដុល្លារហុងកុង ពោលគឺកើនឡើងពី ៩,៩ ពាន់លានដុល្លារហុងកុង ក្នុងរយៈពេល ៦ ខែដំបូងនៃឆ្នាំនោះ ជាមួយនឹងការគិតថ្លៃរចនាសម្ព័ន្ធខ្ពស់ជាងការរំពឹងទុក និងការកាត់បន្ថយតម្លៃទ្រព្យសម្បត្តិ។
គួរឲ្យដឹងដែរថា ក្រុមអ្នកវិភាគបានរំពឹងថា ក្រុមហ៊ុនខាងលើនឹងខាតបង់ ២០,៤ ពាន់លានដុល្លារហុងកុង។ នេះបើយោងតាមការស្ទង់មតិរបស់ទីភ្នាក់ងារព័ត៌មាន Bloomberg មុនពេលការប្រកាស៕